पूर्वप्रधानपञ्चसमेत रहेका लालबहादुरका नातिनी ज्वाइँ कमलबहादुर तथा नातिनीहरू पर्वती, राधा, सिता, शान्ति र पनाती पवनको तर्फबाट विद्यालयलाई सहयोग प्राप्त भएको प्रअ खत्रीले बताए । विद्यालयले सहयोगीदाताहरूलाई सम्मानसमेत गरेको थियो । विद्यालयलाई धेरै दाताहरूले सघाउने गरे पनि ठूलो रकमको सहयोग पहिलो पटक प्राप्त भएको उनले बताए । विद्यालयले सहकारीमा १० वर्षसम्म करिब १२ लाख रुपैयाँजति ब्याज तिरिसकेको छ । 

विद्यालयका लागि नयाँ जग्गा खरिद र त्यसमा पक्की भवन निर्माण गर्ने क्रममा रकम अपुग भएपछि सहकारीमा लालपूर्जा राखेर ऋण झिक्नुपरेको उनले बताए । ‘पुरानो विद्यालय रहेको ठाउँ अपायक, भिरालो र पहिरोको उच्च जोखिममा थियो,’ उनले भने, ‘समुदायस्तरबाट नै रकम संकलन गरेर खरिद गरिएको जग्गामा पक्की भवन निर्माण गर्‍यौं । निजी स्रोतबाट तलब खुवाउने गरी माध्यमिक शिक्षक राखेका थियौं । सबै खर्च धान्नका लागि ऋणमै विद्यालय चलाउनुपर्ने अवस्था आयो ।’

कक्षा १ देखि १० सम्म पढाइ हुने विद्यालयमा हाल ९४ जना विद्यार्थी अध्ययनरत छन् । विद्यालय नयाँ स्थानमा बनेसँगै विद्यार्थीलाई पायक पर्ने भएकाले विद्यार्थी संख्या क्रमश: बढ्दै गएको प्रअ खत्रीले बताए । विद्यालयलाई तत्काल तारबार र खेलमैदान निर्माण गर्न सके अझ राम्रो हुने उनले बताए ।