नवलपुर — चिटिक्क परेका कक्षाकोठाका भित्ताभरि बालबालिकालाई आकर्षित गर्ने चित्र छन्। भित्तामै अध्ययनका लागि अक्षर र रमाइलोका लागि कार्टुन कला कोरिएका छन् ।

कक्षाकोठाको यस्तो वातावरणमा मग्न भएर रमाइरहेका बालबालिका छन् । यो कुनै निजी विद्यालयको ‘मन्टेश्वरी’ कक्षाको दृश्य भने होइन । 

पूर्वी नवलपरासीको हुप्सेकोट–१ स्थित सूर्य ज्योति माध्यमिक विद्यालयको पूर्व प्राथमिक तहको कक्षाकोठा हो । संस्थागत विद्यालयको जस्तै शैक्षिक वातावरणमा छोराछोरी अध्ययन गराउन पाउँदा यहाँका अभिभावक खुसी छन् ।

तल्लो तहका कक्षाको शैक्षिक वातावरण सुधार भएमात्र माथिल्लोमा शैक्षिक गुणस्तर वृद्धि हुने योजनाका साथ हुप्सेकोट र बौदीकाली गाउँपालिकामा सञ्चालन भइरहेको सिकाइ परियोजनाले प्राथमिक तहका विद्यार्थीको संख्याका साथै सिकाइ उपलब्धि वृद्धि भएको तथ्यांक सार्वजनिक भएको छ । 

विद्यार्थीको न्यून उपस्थिति र कमजोर भौतिक पूर्वाधारका कारण पढाइमा कमजोर यहाँका बालबालिका ‘सिकाइ परियोजना’ लागू भएपछि खुसी छन् । पहाडी भेगबाट बालबालिका पढाउन भनेर बसाइँसराइ सरेर सहर आउनेक्रम बढ्दो छ । गाउँमै बसिरहेकाहरू सरकारी विद्यालयको नाजुक भौतिक अवस्थाका कारण चिन्तित थिए ।

सिकाइ परियोजना लागू भएपछि बालबालिकाको चौतर्फी विकासमा टेवा पुगेको सूर्य ज्योति माविका प्रधानाध्यापक वीरबहादुर कुमालले बताए ।  ‘तालिमप्राप्त शिक्षक, सिकाइ मैत्री कक्षाकोठा र आईसीटी कक्षाले विद्यार्थीमा अध्ययनप्रतिको रुचि बढेको छ,' उनले भने,‘निजी विद्यालयको भन्दा पनि राम्रो वातावरणमा बालबालिकाले अध्ययन गर्न पाएका छन् । कमजोर विद्यार्थीलाई उपचारात्मक कक्षा थप प्रभावकारी भएको छ।’