गुरुङ शिक्षक नभएका विद्यालयबाट चार जना मगर शिक्षकलाई पनि खेमा लिपीको तालिम दिइएको उनले बताए । ‘आगामी वर्ष विद्यालयको स्थानीय पाठ्यपुस्तकमै खेमा लिपी समावेश गरिनेछ,’ उनले भने । अहिले विद्यार्थीहरूलाई हप्ताको एक दिन अतिरिक्त कक्षाको व्यवस्था गरी खेमा लिपी सिकाइने तयारी गरिएको पनि उनले जानकारी दिए ।

अर्को वर्ष मगर भाषाको तालिमसमेत शिक्षकहरूलाई उपलब्ध गराइने गाउँपालिकाले जनाएको छ । मगर भाषा संकटमा परेकाले पहिले भाषा र त्यसपछि मगर लिपीसमेत सिकाइने अध्यक्ष भुसालले बताए । समुदायस्तरमा पनि भाषाको तालिम आवश्यक रहेको माग बढ्दै गएको उनले उल्लेख गरे । भाषा तालिमका लागि तीन लाख रुपैयाँ बजेट छुट्टाइएको छ ।

जनविकास माध्यमिक विद्यालय लामटुङकी शिक्षिका मनमाया गुरुङले खेमा लिपी प्रशिक्षण आफ्नो लागि उपयोगी मात्र नभई गर्वको विषय भएको बताइन् । ‘मातृभाषा गुरुङ भए पनि अक्षर चिन्न सक्दिनथें,’ उनले भनिन्, ‘गुरुङ संस्कृति र पहिचानलाई खेमा लिपीले जीवन्त बनाइराख्न सहयोग पुर्‍याउनेछ ।’ गाउँपालिका नै भाषा र लिपी संरक्षण अभियानमा जुटेकाले विद्यार्थीमाझ पुर्‍याउन सहज हुनेमा उनी विश्वस्त छिन् । खेमा लिपीका केन्द्रीय प्रशिक्षक भीम गुरुङले प्रशिक्षण दिएका थिए ।