पोखरा — सशस्त्र प्रहरीले पोखरा महानगरपालिका–१८ सराङकोटस्थित केबलकारमा उद्धार अभ्यास गरेको छ ।

सशस्त्र प्रहरी बल, नेपालको २४ नम्बर कालिका गणको आयोजनामा कुरिनटारको टोलीले अचानक केबलकार रोकिँदा अड्किने यात्रुको सुरक्षित उद्धारको अभ्यास गरेको हो । शुक्रबार दिउँसो सराङकोटबाट सेदी झर्ने क्रममा सिमतालस्थित केबलकारमा दुई जना यात्रुलाई अड्काएर सशस्त्रले उद्धार अभ्यास गरेको थियो।

भूकम्प, पहिरो, आगलागी तथा बाढीजस्ता विपदका घटनाको उद्धारमा सक्रिय सशस्त्र प्रहरीले केबलकारमा पहिलोपटक अभ्यास गरेको जनाएको छ। नेपालमा पोखरालगायत विभिन्न स्थानमा केबलकारको सख्या थपिँदै गएकाले यस सम्बन्धी उद्धार अभ्यास गरिएको संचालन गरेको सशस्त्रले जनाएको छ।  

उद्धार अभ्यास कार्यक्रममा पोखरा महानगर प्रमुख धनराज आचार्यले पर्यटनको मुख्य आधार बनेका केबलकारजस्ता संरचनामा सम्भावित जोखिम न्यूनीकरणका लागि पूर्वतयारी अत्यन्तै आवश्यक रहेको बताए। ‘विपद्को पूर्वतयारी हुनुपर्छ भन्छौँ, तर तयारी पुगेको हुँदैन,’ उनले भने, ‘भूगोलअनुसार दुर्घटना हुन सक्छन् । त्यसैले नियमित अभ्यास र समन्वय जरुरी छ ।’ नेपाल प्रहरी जनतासँग नजिक रहेर काम गरेको बताउँदै मेयर आचार्यले विपद्मा सशस्त्र प्रहरी अब्बल रहेको बताए। समन्वय र सहकार्यबाट नै विपद् उद्दार सम्भव रहेको बताउँदै उनले जनशक्ति भने न्यून रहेको सुनाए । सशस्त्र प्रहरीका अनुसार हालसम्म केबलकार टावरमा मानवीय क्षति भने भएको छैन् ।