गोरखा — पृथ्वीनारायण शाहले नेपाल एकीकरणको क्रममा प्रयोग गरेको पैदलमार्गमा नेपाली सेनाले पदयात्रा सुरु गरेको छ।

सोमबार गोरखा दरबारस्थित हनुमानभञ्ज्याङबाट नेपाली सेनाले पत्रयात्रा सुरु गरेको हो।

पदयात्राको पहिलो दिन सेनाको रुद्रध्वज गणले भीमसेन थापा–८ बोर्लाङस्थित घाटवेशीसम्मको यात्रा गर्ने छ। पदयात्रा टोली धादिङ, नुवाकोट हुँदै काठमाडौ पुग्ने छ।

गोरखा दरबारबाट काठमाडौंस्थित हनुमानढोकासम्मको २६ कोषको पदयात्रा धादिङ, नुवाकोट हुँदै  पौष २७ गते पृथ्वीजयन्तीका दिन टु‌ंगिने छ।

कालो दौरासलवार, टाउकोमा चातोडा, कम्मरमा खुकुरी, हातमा भरुवा बन्दुकसहित शाहकालीन पोशाकमा सजिएका सेनाको शार्दुलजंग गुल्मको टुकडीसहितको नेपाली सेनाले एकीकरण पैदलमार्गमा यात्रा गरेको हो।

यात्राको पहिलो दिन सेनाको पश्चिम पृतना हेडक्वाटरका पृतनापति उपरथी भोलानाथ थापाले टर्च र झण्डा हस्तान्तरण गरेसँगै पदयात्रा सुरु भएको हो।