नवलपुर — २०७६ सालमा शिलान्यास भएको पूर्वी नवलपरासीमा नमुना सदरमुकाम निर्माणको कामले बल्ल तिव्रता लिएको छ ।

संघ र प्रदेश सरकार अन्तरगतका कार्यालयसँगै खेल मैदान समेत एकै स्थानमा निर्माण गरेर सेवा सञ्चालन गर्ने उद्देश्यले ३ अर्ब ९० करोड लागतमा १३ वटा भवन बनाउने काम भइरहेको हो । 

जिल्ला प्रशासन, एकीकृत भवन र आआफ्नो मन्त्रालय मार्फत अन्य कार्यालय भवन निर्माणको काम धमाधम भइरहेको छ । २०७६ सालमा तत्कालीन प्रधानमन्त्री केपी शर्मा ओलीले शिलान्यास गरेको नमुना सदरमुकाम योजना रुख कटान, डिपिआरलगायतमा ढिलो हुँदा काम अगाडि बढ्न सकेको थिएन ।

यसअघि सबै भौतिक संरचना एकै पटक संघीय सरकारले निर्माण गर्ने तय भए पनि बजेट अभाव भएपछि आआफ्नो मन्त्रालय मार्फत विनियोजन गरेर आवश्‍यकता अनुसारका भवन निमार्णको काम अगाडि बढाइएको हो । यसका लागि कावासोती नगरपालिकामा रहेको १ सय ८६ बिघा वन क्षेत्रको जग्गा सरकारले आफू मातहत ल्याएको छ । 

अहिले दुई वटा टेन्डर मार्फत काम अगाडि बढिरहेको सघन सहरी तथा भवन निर्माण आयोजना चितवनका इन्जिनियर द्रोण कटुवालले बताए। जिल्ला प्रशासन र एकीकृत भवन निर्माणको काम ३० करोड ६५ लाखको लागतमा भइरहेको छ ।

२०८३ पुस २१ सम्म निर्माण सम्पन्न गर्ने गरी सम्झौता भएको यो योजनामा ४० प्रतिशत काम भएको छ । दोस्रो चरणमा टेन्डर भएको ३ अर्ब ६१ करोड लागतमा ११ वटा सरकारी कार्यालयका भवन निर्माणको काम भइरहेको इन्जिनियर कटुवालले बताए । 

दोस्रो चरणमा ठेक्का लागेका ११ वटा कार्यालयको भवन २०८४ कात्तिकसम्म सम्पन्न भइसक्नुपर्ने छ । अहिलेसम्म निर्माण भइरहेका सबै संरचना संघीय कार्यालयका हुन् । यही क्षेत्रमा गण्डकी प्रदेश सरकारले पनि आफू मातहतका कार्यालय भवन निर्माण गर्ने तयारी पनि गरिरहेको छ ।