स्याङ्जा — एकीकृत सेवा कार्यालय स्याङ्जाले जिल्लाका किशोरीहरूलाई शारीरिक तथा मानसिक रूपमा सुरक्षित रहन सक्षम बनाउने उद्देश्यले आत्मरक्षा तालिम सञ्चालन गरेको छ । किशोरीहरू एक्लै हिँडडुल गर्दा, मेलापात तथा घाँस–दाउरा गर्ने क्रममा हुन सक्ने सम्भावित लैङ्गिक हिंसाबाट जोगिन तथा आवश्यक पर्दा प्रतिकारसहित आत्मरक्षा गर्न सकून् भन्ने उद्देश्यले तालिम प्रदान गरिएको हो ।

लैङ्गिक हिंसाविरुद्धको १६ दिने अभियानको अवसरमा आयोजित उक्त तालिम दुई दिनसम्म सञ्चालन गरिएको थियो । तालिममा किशोरीहरूलाई गुड टच र ब्याड टचको पहिचान, साइबर अपराधबाट सुरक्षित रहने उपाय, आत्मरक्षाका चरणबद्ध शारीरिक सीप तथा मानसिक सशक्तीकरणका विषयमा प्रशिक्षण दिइएको थियो । साथै बालिका तथा किशोरीमा नेतृत्व विकाससम्बन्धी अभ्यासहरू पनि समेटिएका थिए ।

कार्यक्रममा बोल्दै गण्डकी प्रदेशसभा सदस्य सुनिता थापाले आत्मरक्षा तालिमको महत्त्व औँल्याउँदै नेपाली समाजका केही पुरातन सोच र परम्पराले महिला तथा किशोरीलाई साँघुरो घेराभित्र सीमित गरेको बताइन् । उनले यस्ता तालिमले त्यस्ता घेराहरू तोड्न मद्दत पुयाउने विश्वास व्यक्त गरिन् ।

चापाकोट नगरपालिका शिक्षा शाखा प्रमुख इन्दु भेटवालले यस प्रकारका कार्यक्रमले लैङ्गिक हिंसा र विभेदका घटना न्यूनीकरण गर्नुका साथै किशोरीहरूको सक्षमता अभिवृद्धि हुने बताइन् । उनले किशोरीहरूले हरेक क्षेत्रमा नेतृत्वदायी भूमिका निर्वाह गर्न आफ्नो अन्तरनिहित क्षमताको विकास गर्नुपर्नेमा जोड दिइन् ।

एकीकृत सेवा कार्यालय स्याङ्जाका प्रमुख जीवन पौडेलले आत्मरक्षा तालिमले किशोरीहरूलाई सुरक्षित रहने उपाय मात्र सिकाउने नभई जीवनका हरेक चुनौती सामना गर्ने साहस र आत्मबल प्रदान गर्ने उल्लेख गरे । प्रहरी नायब उपरीक्षक दीपक मल्लले लैङ्गिक हिंसा अन्त्यका लागि सचेतनासँगै कानुनी उपचारको बाटो अपनाउनुपर्ने बताए।