नवलपरासी — गैँडाकोटमा रहेको मौलाकाली केबलकारको आजदेखि मर्मत–सम्भार सुरु भएको छ । गत भदौ २४ गते ‘जेन जी’ आन्दोलनका क्रममा यस केबलकारमा आगजनी गरिएको थियो । त्यसयता लगातार ६० दिनदेखि मौलाकाली केबलकारको सेवा बन्द रहेको छ ।

केबलकारका स्टेशन म्यानेजर सुरज पौडेलका अनुसार अस्ट्रियाबाट आएका प्राविधिक इन्जिनियरले केबलकारको मर्मत तथा पुनर्निर्माणको काम सुरु गरेका हुन् । आगजनीका कारण तल्लो स्टेशन र केबल तान्ने तार दुवै क्षतिग्रस्त भएका थिए ।

आइएमई समूहका अध्यक्ष तथा उद्योग वाणिज्य महासंघका केन्द्रीय अध्यक्ष चन्द्र ढकालको करिब दुई अर्ब रुपैयाँ लगानीमा बनेको यो केबलकार साढे दुई वर्षअघि सञ्चालनमा आएको हो ।

यहाँको डाँडाकालीमा अवस्थित मौलाकाली मन्दिर दर्शन गर्न सहज होस् भन्ने उद्देश्यले केबलकार निर्माण गरिएको थियो । मर्मत–सम्भारको काम सकेर मंसिर १ गतेदेखि पुनः केबलकार सञ्चालन गरिने कार्यतालिका रहेको स्टेशन म्यानेजर पौडेलले जानकारी दिए । केबलकारमा १२ वटा डब्बा रहेका छन्, जसले एकपटकमा ९६ जना ओहोरदोहोर गर्न सक्छन्।

१२ सय मिटर लम्बाइको यो केबलकारबाट माथिल्लो स्टेशन पुग्न पाँच मिनेट समय लाग्छ । साउनसम्मको साढे दुई वर्ष अवधिमा करिब छ लाख दर्शनार्थीले ओहोरदोहोर गरेका छन् । केबलकारको माथिल्लो स्टेशनमा दर्शनार्थी र पर्यटकका लागि सुविधा सम्पन्न “इला रिसोर्ट मौलाकाली” सञ्चालनमा रहेको छ, जुन चितवन र नवलपरासीको सबैभन्दा आकर्षक रिसोर्ट मानिन्छ । यहाँबाट चारैतिरको मनमोहक दृश्य पनि अवलोकन गर्न सकिन्छ ।

केबलकार सेवा पुनः सुचारु भएपछि पर्यटकीय तथा धार्मिक गन्तव्य मौलाकाली मन्दिर दर्शन गर्न भक्तजनहरूलाई सहज हुनेछ । पर्यटकहरूले रिसोर्टको आतिथ्य र अन्य सेवाहरू प्राप्त गर्न सक्ने स्टेशन म्यानेजर पौडेलले बताए । चन्द्रागिरि हिल्सले पनि सो जानकारी दिएको छ ।

गत भदौ २४ गते भएको तोडफोडका कारण केबलकारको बटम स्टेशनमा पूर्ण क्षति पुगेपछि केबलकार र रिसोर्ट दुवैको सेवा अवरुद्ध भएको थियो ।