कास्की — परिस्थिति अनुकूल नरहेको भन्दै एक महिनाअघि स्थगित गण्डकी प्रदेशसभाको बैठक कात्तिक २४ गते बस्ने भएको छ । 

सभामुख कृष्णप्रसाद धितालले चालु बर्खे अधिवेशनको २७ औं बैठक उक्त दिन दिउँसो १ बजे पोखराको मालेपाटनस्थित कृषि, भूमि व्यवस्था तथा सहकारी मन्त्रालयको सभाहलमा बस्ने गरी मंगलबार मिति र स्थान तोकेका हुन् । 

संसद् सचिवालयमा दुई वटा विधेयक दर्ता भएका छन् । चालु अधिवेशनमा गाँजासम्बन्धी विधेयक र गण्डकी विश्वविद्यालय ऐन संशोधन विधेयकलाई सम्बन्धित समितिमा छलफलका लागि पठाउने तयारी छ । यसबाहेक खानी तथा खनिजसम्बन्धी विधेयक संसद्बाट पारित गरेर चालु अधिवेशन अन्त्य गर्ने योजनामा सभामुख छन् । 

बैठक सञ्चालन गर्न साउन्ड सिस्टम भाडामा लिने तयारी रहेको प्रदेशसभा सचिवालयका सूचना अधिकारी शशीधर सुवेदीले बताए । बैठक चलाउन आवश्यक कुर्सी–टेबल र आसन व्यवस्थापनको तयारी अघिल्लोपटक बैठक बोलाउँदा नै भइसकेको उनले सुनाए । ‘बैठक हलको काम पहिल्यै भइसकेको छ । हामी एकदिन गएर फेरि हेर्छौं । अडियो–भिडियोका लागि आवश्यक उपकरणको व्यवस्था गर्न बाँकी छ । त्यो भाडामा लिन्छौं,’ उनले भने ।