कास्की — पोखरा महानगरपालिकाले तिहारको समयमा सबैभन्दा धेरै खपत हुने सयपत्री फूलको बिक्री मूल्य तोकेको छ । महानगरले पोखरामै उत्पादित फूल तीन प्रकारमा ग्रेडिङ गरेर कारोबार मूल्य तोकेको हो ।

कृषि सञ्जाल, पोखरा उद्योग वाणिज्य संघ, फ्लोरिकल्चर एसोसिएसन कास्की, कृषि ज्ञान केन्द्र कास्कीसँग छलफल गरेपछि मूल्य निर्धारण गरिएको हो । ‘ए’ ग्रेड १५ देखि २० ग्राम प्रति थुंगा फूलको मूल्य ५ रुपैयाँ र प्रति माला १ सय ५० रुपैयाँ पर्ने महानगरको आर्थिक विकास महाशाखा प्रमुख मनहर कडरियाले बताए । उनका अनुसार ‘बी’ ग्रेड १० देखि १५ ग्राम प्रति थुंगा फूलको मूल्य ४ रुपैयाँ र प्रति माला १ सय ३० रुपैयाँ पर्नेछ । ’सी’ ग्रेड ५ देखि १० ग्राम प्रति थुंगा फूललाई २ रुपैयाँ र प्रति माला १ सय रुपैयाँ पर्ने उनले बताए । तीन वटै ग्रेडका फूल प्रति केजी ३ देखि ४ सय रुपैयाँमा पाइने उनले बताए । 

पोखराका २५ भन्दा ब ढी स्थानलाई सयपत्री फूलको बिक्री स्थल पनि तोकिएको छ । पोखराको बगर, काहुँ जाने चौतारी, संगमचोक, नदीपुर, बैदाम, सभागृह, बुढीबजार, तालचोक, बेगनास ताल, बिरौटा, हेमजा मिलनचोक, महेन्द्रपुललगायत ठाउँका किसान बजार र वडा कार्यालयमा कात्तिक ३, ४ र ५ गते फूल खरिदबिक्री हुनेछन् ।