आगजनीबाट पोखराको बगरस्थित वडा प्रहरी कार्यालय क्षतविक्षत छ । पोखराको उत्तरी बेल्टका ८ वटा वडा, अन्नपूर्ण र माछापुच्छ्रे गाउँपालिका कार्यक्षेत्र भएको यो कार्यालय अहिले आफैं असुरक्षित छ । भागेका ९ जना थुनुवा फिर्ता आएका छैनन्, हराएका हतियार पनि भेटिएका छैन । टाउको लुकाउने छत र शरीर बिसाउने खाट पनि ध्वस्त भएका छन् ।

भवन तत्कालै पुनः प्रयोग गर्न नमिल्ने अवस्थामा छ । प्रतीक्षालय र पहिला कन्ट्रोल कक्ष रहेको कोठाबाट सेवा प्रवाह थालिएको कार्यालयका निमित्त प्रमुख प्रहरी नायब निरीक्षक यानबहादुर कुँवरले सुनाए । सरकारी पोसाक, व्यक्तिगत पोसाक, हतियार, कागजात, सवारी जलेको र चोरी भएको उनले बताए ।

वडा प्रहरी कार्यालय बगरमा ५२ जना प्रहरी कार्यरत छन् । आगजनीमा परेकै खाटमा सुत्नुपर्ने यहाँका प्रहरीको बाध्यता छ । ‘कार्यालयमा फलामका खाट थिए । कपडा यहीँ सहयोग प्राप्त भयो । त्यसैमा सुतेका छौं । हामीले बत्ती, पानी, इन्टरनेट जोडेका छौं,’ उनले सुनाए ।

प्रतीक्षालयमै निवेदन लिने, मिलापत्र गराउने काम भइरहेको उनले बताए । मुद्दासम्बन्धी काम भने सुरु भएको छैन । कार्यालय पुनर्निमार्ण गर्न सामुदायिक सेवा केन्द्र बगरका पूर्वाध्यक्ष पुरुषोत्तम श्रेष्ठको संयोजकत्वमा समिति बनाइएको छ । जिल्ला प्रहरी कार्यालय कास्कीको भवनमा पनि आगजनीबाट क्षति पुगेको छ । गस्ती र म्याद थपबाहेक अरु काम हुन सकेको छैन । जिल्लाभित्र आंशिक र पूर्ण गरेर २७ वटा प्रहरी यूनिटमा क्षति पुगेको कार्यालयका सूचना अधिकारी डीएसपी हरिबहादुर बस्नेतले बताए । कास्कीमा जिल्ला प्रहरी र त्यस मातहतका अस्थायी ट्राफिक पोस्ट, प्रहरी चौकी, इलाका प्रहरी कार्यालय, वडा प्रहरी कार्यालय गरेर ५६ वटा प्रहरी यूनिट छन् ।