भदौ २४ मा सांसद गुरुङको घर तोडफोडमा सहभागी रहेको भेटिएपछि रास्वपाले संयोजक भोजराज पौडेललाई निलम्बन गरेको छ।
What you should know
कास्की — पोखरास्थित सरकारी कार्यालय, सांसदको घर तोडफोड र लुटपाटसम्बन्धी घटनामा रास्वपाका वडा संयोजक संलग्न रहेको पाइएको छ ।
रास्वपा मादी गाउँपालिका–६ का संयोजक भोजराज पौडेल जेन–जी आन्दोलनको दिन भदौ २४ मा पोखरा–१३ स्थित जलस्रोत तथा सिँचाइ विकास डिभिजन कार्यालय र पोखरा–११ चिसापानी कर्नरस्थित प्रदेश सभा सदस्य वेदबहादुर गुरुङको घर तोडफोडमा संलग्न रहेको भेटिएको हो ।
कान्तिपुरलाई प्राप्त भदौ २४ गतेका दुई भिडियोमा उनले सिँचाइ कार्यालयको गेटमा लात्ती हानेको तथा सांसद गुरुङको घरमा सात पटकसम्म ढुंगा प्रहार गरेको देखिन्छ । सांसद गुरुङको घरमा भएको लुटपाटमा भने उनी प्रत्यक्ष संलग्न देखिँदैनन् । उनी एक्लै घरका सबै सीसा फुटाउन व्यस्त देखिन्छन् । यसका लागि उनले कम्पाउन्डबाहिरबाट चार पटकसम्म ढुंगा ओसारेका थिए ।
घरबाट ६ तोला सुन, ४७ हजार नगद, संकलित विदेशी मुद्रा, कम्प्युटर, टीभी, जुत्ता–कपडा चोरी भएको सांसद गुरुङले बताए । ‘परिवारका सदस्य बाहिर थियौं । आगो पनि लगाउन खोजेका रहेछन्,’ उनले भने, ‘छिमेकीले रोकेपछि आगो लाग्न पाएन । तोडफोड र चोरीले ठूलो नोक्सान भयो ।’
एमालेबाट निर्वाचित गुरुङ मादी गाउँपालिकाका निवर्तमान अध्यक्ष हुन् । एउटै पालिका भएकाले आफ्नो घर तोडफोड गर्ने पौडेलसँग चिनजान भए पनि कुनै व्यक्तिगत रिसइबी नरहेको सांसद गुरुङले बताए । ‘पहिला एमालेमै थिए । फेसबुकमा मेरो पोस्टमा कमेन्ट पनि गर्थे । मैले उनलाई केही लेख्थिनँ,’ उनले भने, ‘व्यक्तिगत केही छैन । यस्तो गर्लान् भन्ने नै थिएन ।’
यो घटनामा संलग्न वडा संयोजक पौडेललाई रास्वपाले सोमबार निलम्बन गरेको छ । उनलाई रास्वपा गण्डकी प्रदेश अनुशासन आयोगले पार्टीको आचारसंहिताभन्दा बाहिर रहेर अवाञ्छित गतिविधिमा संलग्न देखिएकाले अर्को निर्णय नहुँदासम्म सबै जिम्मेवारीबाट निलम्बन गरेको हो ।
