पोखरा — पर्वतको कुश्मामा कार्यालय रहेको बैशाली सहकारी संस्थामा बचतकर्ताको १० करोड ६४ लाख रकम हिनामिनामा संलग्न रहेका ७४ जनाविरुद्ध प्रहरीले जिल्ला अदालतमा आइतबार मुद्दा दर्ता गरेको छ ।

सहकारीमा भएको रकम हिनामिनाका अनुसन्धान अधिकृत सुमित श्रेष्ठका अनुसार हिनामिनामा संलग्न ७४ जनाबाट १० करोड ६४ लाख बिगो मागदाबी गर्दै प्रहरीले मुद्दा दर्ता गरेको हो । 

सहकारी रजिस्ट्रारको कार्यालय पोखरा एक महिनाअघि छानबिन गरेर दिएको प्रतिवेदनलाई आधार मानेर प्रहरीले अनुसन्धान थालेको हो ।

प्रहरीले हिनामिना गरेकाहरुलाई रकम दाखिला गर्न उर्दी गरेपछि एक महिनाको अवधिमा ८ करोड भन्दा धेरै बचतकर्ताको रकम फिर्ता भएको थियो । 

प्रहरीले अनुसन्धान थालेको एक महिनाको अवधिमा एउटै सहकारीमा रकम हिनामिना गरेकाहरुले यति धेरै रकम फिर्ता गरेको यो पहिलो घटना हो ।

सहकारीमा रकम हिनामिना भएको उजुरी पश्चात गत साउनमा सहकारी रजिस्ट्रारको कार्यालयले छानबिन गर्दा त्यहाँ १८ करोड ७६ लाख रकम हिनामिना गरेको ठहर गरेको थियो । प्रहरीले रकम हिनामिनामा संलग्नहरुलाई नगद फिर्ता गर्न दिएको समय सिमाभित्र ८ करोड नगद रकम फिर्ता भएको हो ।

त्यहाँ सहकारीको रकम हिनामिनामा संलग्न १ सय ५३ जनाविरुद्ध छानबिन सुरु गर्दा हिनामिनामा संलग्न हुने सेयर सदस्यहरुको संख्या ४ सय ११ जना पुगेको थियो ।

एउटै सहकारीको रकम हिनामिनामा ४ सय ११ जना संलग्न भएको यो नेपालको पहिलो घटना भएको छानबिनमा संलग्न प्रहरी अधिकृत श्रेष्ठले जानकारी दिए । ४ सय ११ जना सेयर सदस्य संगठित भएर रकम हिनामिनामा संलग्न भएको अनुसन्धानले देखाएको हो ।

प्रहरीका अनुसार १ सय ५३ जना हिनामिनामा संलग्न रहेर १८ करोड ७६ लाख हिनामिना भएकोमा हिनामिनामा संलग्नहरुले ८ करोड भन्दा धेरै रकम बुझाएपछि १० करोड ६४ लाख बिगो माग दाबी सहित प्रहरीले आइतबार साँझ अबेर अदालतमा मुद्दा दर्ता गरेको हो । 

सहकारी रजिस्ट्रारको कार्यालय पोखराले गत असारमा वित्तीय विश्लेषक निर्मल गौतमलाई खटाएर बैशालीको रकम छानबिन गरेपछि सहकारीमा बचतकर्ताको रकम अनियमितता भएको तथ्य बाहिरिएको थियो । 

सहकारीकी व्यवस्थापक कुमारी पुर्जाले सहकारीको सेयर सदस्यसमेत नरहेका स्थानीयबाट दैनिक, मासिक रकम संकलन गरेर त्यस्तालाई ऋण दिएको छानबिन प्रतिवेदनमा उल्लेख छ । सेयर सदस्य बाहिरका व्यक्तिबाट बचत रकम संकलन गर्नु र ऋण दिनु सहकारी ऐन विपरीत हो ।

संस्थाका सञ्चालक समिति, र व्यवस्थापकको मिलोमतोमा रकम हिनामिना भएको पाइएको हो । सहकारीको रकम नक्कली ऋणि बनाएर निकासा गरिएको, त्यस्तो रकम सोझै ढिकुटी र व्यापार व्यवसायमा लगानी गरेर हिनामिना गरेको पाइएको प्रतिवेदनमा उल्लेख छ ।

व्यवस्थापक कुमारी पुर्जाले सञ्चालक समिति र ऋण उपसमितिलाई समेत जानकारी नदिई कर्जा लगानी गरेको पाइएको छ । व्यवस्थापक आफैंले एक करोड भन्दा बढी रकम हिनामिना गरेको छानबिन प्रतिवेदनमा उल्लेख छ । उनी आफैंले खेलाएको ढिकुटीमा सहकारीको पैसा कर्जा दिएर लगानी गराएकी छन् । 

कुमारीले ५ जना महिलालाई ८ करोड भन्दा धेरै ऋण दिएर हिनामिना गरेको छानबिन प्रतिवेदनमा उल्लेख छ । सञ्चालक समितिले गत असारमा निर्णय नै गरेर छानबिन गरिपाउँ भनेर आफूलाई पत्र पठाएपछि वित्तीय विश्लेषक निर्मल गौतमले यो सहकारीको हिसाब छानबिन गरेर प्रतिवेदन दिएका थिए ।