लमजुङ जिल्ला अदालतको अनुमतिमा प्रहरीले ‘सहकारी ठगीसम्बन्धी मुद्दा’मा बेंसीसहरमा कार्यालय रहेको सुनौलो भविष्य बचत तथा ऋण सहकारी संस्थाका वर्तमान अध्यक्ष ऋषिराम अधिकारीसहित १७ जनालाई साउन ५ गते र पछि केही दिनअघि १ जनालाई पक्राउ पुर्जी जारी गरेको थियो ।
What you should know
लमजुङ — सहकारी ठगीसम्बन्धी मुद्दामा अनुसन्धान गर्न लमजुङ प्रहरीले बेंसीसहरस्थित मर्स्याङ्दी बहुमुखी क्याम्पसका सहायक क्याम्पस प्रमुख पदमबहादुर रावतलाई पक्राउ गरेको छ ।
जिल्ला प्रहरी कार्यालय प्रमुख डीएसपी रेशम बोहराले राउतलाई आइतबार बेंसीसहरबाट पक्राउ गरिएको पुष्टि गरे । उनी बेंसीसहर कार्यालय रहेको सुनौलो भविष्य बचत तथा ऋण सहकारी संस्था लिमिटेडका तत्कालीन व्यवस्थापक, अध्यक्ष तथा लेखा समितिका पदाधिकारी रहेको प्रहरीले जनाएको छ ।
लमजुङ जिल्ला अदालतको अनुमतिमा प्रहरीले ‘सहकारी ठगीसम्बन्धी मुद्दा’मा बेंसीसहरमा कार्यालय रहेको सुनौलो भविष्य बचत तथा ऋण सहकारी संस्थाका वर्तमान अध्यक्ष ऋषिराम अधिकारीसहित १७ जनालाई साउन ५ गते र पछि केही दिनअघि १ जनालाई पक्राउ पुर्जी जारी गरेको थियो । पक्राउ पुर्जी जारी भएको लामो समयसम्म प्रहरीले आरोपितलाई पक्राउ गर्न नसकेको जानकारीसहित केही दिनअघि इकान्तिपुर डटकमले समाचार प्रकाशित गरेको थियो । समाचार प्रकाशित भएपछि पक्राउ पूर्जी जारी भएकाहरुले जिल्ला छाडे पनि रावत भने बेंसीसहरमै थिए ।
जिल्ला प्रहरी कार्यालयका सूचना अधिकारी प्रहरी निरीक्षक राजकिशोर साह तेलीले पक्राउ परेका रावतविरुद्ध जिल्ला अदालतमा ७ दिनको म्याद थप गरी ‘सहकारी ठगीसम्बन्धी मुद्दा’मा थप अनुसन्धान अघि बढेको बताए ।
यसअघि गत मंसिर तेस्रो साता बेंसीसहरस्थित कालिका बचत तथा ऋण सहकारी संस्था लिमिटेडसँग सम्बन्धित सहकारी ठगीसम्बन्धी मुद्दामा मर्स्याङ्दी बहुमुखी क्याम्पसका प्रमुख हरिबाबु थापालाई प्रहरीले पक्राउ गरेको थियो । उनी पछि ७ लाख रुपैयाँ धरौटी बुझाएर निस्किएका थिए ।
सुनौलो भविष्य बचत तथा ऋण सहकारी संस्थामा सञ्चालकहरुले बचतकर्ताको ६ करोड ५४ लाख रकम हिनामिना गरेको भन्दै सहकारी रजिस्ट्रारको कार्यालय पोखराको प्रतिवेदनमा उल्लेख छ ।
