न्यायिक कारबाहीलाई प्रभावकारी बनाउन सादा पोसाकको प्रहरी टोलीले पौडेललाई पक्राउ गरी अदालतमा बुझाएको छ।
स्याङ्जा — लागुऔषध मुद्दाका फरार कसुरदार २२ वर्षपछि पक्राउ परेका छन् । जिल्ला अदालत स्याङ्जाबाट २०५९ वैशाख २३ गते भएको फैसलाले १० महिना १८ दिन कैद सजाय र ५ हजार जरिवाना तोकिएका आँधीखोला गाउँपालिका–४ का ४८ वर्षीय रामचन्द्र पौडेललाई आज पक्राउ गरिएको हो ।
पक्राउ परेका पौडेललाई जिल्ला अदालतमा बुझाइएको जिल्ला प्रहरी प्रवक्ता डीएसपी प्रशन्नराज चौधरीले जानकारी दिए ।
अदालतबाट भएका फैसला कार्यान्वयनलाई चुस्त, दुरुस्त र प्रभावकारी बनाई न्यायिक कारबाहीलाई पूर्णता दिई, सुरक्षित र न्यायपूर्ण समाज निर्माण अभियानअन्तर्गत सादा पोसाकमा खटिएको प्रहरी टोलीले पौडेललाई पक्राउ गरेको थियो ।
