गाउँपालिकाको बाजुङ–५ वारि पातिचौरले तल्लो मोदी खोला जलविद्युतको ड्याम मुन्तिर पुछारमा छरपस्ट फोहोर फाल्दै आएको छ । बर्खाको समय भएकाले सबै फोहोर खोलामा मिसिएका छन् । यता देउपुर–२ पारि पातीचौरले पनि नेपाल विद्युत् प्राधिकरणको जग्गामा काँडे तारको बार लगाएर जथाभावी फोहोर फाल्दै आएको छ । नजिकै पार्वती खोला, मोदी खोला र घाट पनि भएकाले फोहोर फाल्ने काम बन्द गर्नुपर्ने स्थानीयको माग छ ।  

पोखरा–बागलुङ हाइवे हुँदै कुश्मा, बागलुङ, म्याग्दी र मुस्ताङ पुग्ने पर्यटक डिमुवा र पातिचौर भएर जानुपर्ने हुन्छ । यस ठाउँ असला माछाको लागि पनि परिचित छ । ‘डिमुवा, पातिचौर र विशेष गरी अम्बोट माछाको लागि प्रख्यात हो,’ स्थानीय रविन केसीले भने, ‘मोदीको माछा खान पर्यटकहरू लालायित भएर आउँछन् । तर हामीचाहिँ त्यही खोला वरिपरि फोहोर फाल्ने गर्छौँ । यो सुहाउने कुरा होइन । गाउँपालिकाले बेलैमा ध्यान पुर्‍याउन आवश्यक छ ।’

मोदी गाउँपालिका अध्यक्ष हिरादेवी शर्माले फोहोर व्यवस्थापनको जिम्मेवारी निजी संस्थालाई दिने तयारी भएको बताइन् । ‘अस्थायी रूपमा अहिले बजार क्षेत्रका वडाहरू ५, ६ र २ ले आफ्नै तरिकाले व्यवस्थापन गर्दै आएका छन्,’ उनले भनिन्, ‘म निर्वाचित भएर आएदेखि नै स्थायी फोहोर व्यवस्थापनमा लागिरहेकै छु । यस वर्षचाहिँ जसरी पनि जग्गा फाइनलको काम गर्छौँ ।’ तीन वटा वडाको जार क्षेत्रमा मात्रै ७ सय बढी घरधुरीहरू रहेको उनले बताइन् ।