गोरखामा मोटरसाइकलले ठक्कर दिँदा गम्भीर घाइते पैदलयात्रीको उपचारको क्रममा निधन, चालक नियन्त्रणमा, घटनाको थप अनुसन्धान जारी।
गोरखा — मोटरसाइकलको ठक्करबाट गोरखा नगरपालिका–१० वीरेनचोकका ७० वर्षीय क्षेत्रबहादुर थापाको मृत्यु भएको छ ।
बुधबार आवुँखैरेनीबाट गोरखा तर्फ आउँदै गरेको लु ६१ प ४६८५ नम्बरको मोटरसाइकलको ठक्करबाट पैदल हिँडरहेका थापा घाइते बनेका थिए । गम्भीर घाइते थापाको उपचारको क्रममा चितवनको मनकामना अस्पतालमा मृत्यु भएको जिल्ला प्रहरी कार्यालय गोरखाका प्रहरी निरीक्षक धुव्रप्रसाद शर्माले जानकारी दिए ।
मोटरसाइकल चालक नवलपुर मध्यबिन्दु नगरपालिका–१ का २९ वर्षीय साजन जिसीलाई नियन्त्रणमा लिएर घटनाको थप अनुसन्धान भइरहेको प्रहरीले जनाएको छ ।
