नियतवश नभई सिकार गर्ने क्रममा गोलीको छर्रा लागेको शाहीको भनाइ
What you should know
स्याङ्जा — गत मंगलबार पुतलीबजार नगरपालिका–७ ठूलाडिहीका ६९ वर्षीय हुमबहादुर शाही अघिल्ला दिनजस्तै सिकार खेल्न जंगल गए । फुर्सदको समय उनी प्रायः जसो सिकार गरिरहन्छन् । उक्त दिन पनि खाना खाएर जंगल गएका थिए । सिकार गर्ने क्रममा एकाएक बन्दुक पड्कियो । गोलीका छर्रा यत्रतत्र फैलिए । उनलाई भने छर्राले छोएन ।
ठूलाडिही नै घर भई हाल पोखरा महानगरपालिका–२६ बस्दै आएका ४४ वर्षीय सुरेन्द्र रेग्मी सोही दिन (साउन ६) गाउँ गएका थिए । घर नजिकै रहेको बारीमा सुन्तलाको बिरुवा रोप्नका लागि खाल्टो खन्दै थिए । त्यही बेला बन्दुकको ठूलो आवाज आयो । उनीलाई बन्दुकको छर्राले लाग्यो । घाइते भए ।
सिकार गरेका शाहीले रेग्मी घाइते भएको देखे । घरको पिढीँसम्म लगेर राखे अनि उनी हिँडे । घाइतेकी श्रीमती गीताले उपचारका लागि प्रदेश अस्पताल कुमालगाउँ लगिन् । उपचारका क्रममा प्रहरीले घटनाबारे जानकारी पायो । अस्पतालमै खटिएका सादा पोसाकका प्रहरीले जिल्ला प्रहरीमा खबर गरे । घटना थाहा पाउनेबित्तिकै जिल्ला प्रहरी कार्यालयबाट घटना अनुसन्धान गर्न प्रहरी ठूलाडिही पुग्यो । तर, कारण भने खुलेन ।
गोलीको छर्राबाट आँखा र टाउकामा बढी चोट लागे पनि रेग्मीको स्वास्थ्य अवस्था सामान्य रहेको चिकित्सकले बताएका छन् । घाइते रेग्मीलाई थप उपचारका लागि जिल्ला अस्पतालबाट मनिपाल अस्पताल पोखरामा रिफर गरियो । रेग्मीलाई प्रहरीले सोधपुछ गर्दा आफ्नै गाउँका भेना भन्ने हुमबहादुर शाहीले नियतवश आफूमाथि गोली चलाएको किटानी दिए । यता, शाही भने फरार थिए ।
जिल्ला प्रहरी कार्यालयका प्रहरी निरीक्षक प्रवेश तिवारीको नेतृत्वमा प्रहरीले घटना अनुसन्धान गरेको थियो ।अन्ततः शाहीलाई बिहीबार राति तनहुँ गएर लुकेको सूचनाको आधारमा प्रहरीले पक्राउ गर्यो ।
शाहीलाई शुक्रबार जिल्ला अदालत स्याङ्जामा ज्यान मार्ने उद्योग शीर्षकमा मुद्दा दर्ता गरी अनुसन्धानका लागि १० दिनको म्याद थप पाएको जिल्ला प्रहरी प्रमुख दधिराम न्यौपानेले जानकारी दिए ।
पक्राउ परेपछि शाहीले प्रहरीलाई दिएको सूचनाअनुसार एकनाले अवैध बन्दुक प्रहरीले उनको घरबाटै बरामद गरेको छ । एसपी न्यौपानेका अनुसार शाहीको उक्त हतियार अवैध हो । ‘अहिलेसम्म दर्ता, नवीकरण केही प्रमाण भेटिएको छैन,’ उनले भने, ‘सोधपुछ गर्दा बाउबाजेको पालाको हो । पञ्चायतका पालाको हो भन्ने मात्र जवाफ छ । यथार्थ पछि खुल्ला । हामी अनुसन्धानकै क्रममा छौ ।’
प्रहरीले सोधपुछ गर्दा शाहीले बन्दुक आफ्नो रहेको र नियतवश रेग्मीलाई गोली नचलाएको बताएका छन् । शाही भारतीय सेनाबाट अवकाश व्यक्ति हुन् ।
‘हामीले पटकपटक सोधपुछ गर्दा पनि पीडक खुलेका छैनन्,’ प्रहरी स्रोत भन्छ, ‘नियतवश हुन्थ्यो भने घाइते हुनेबित्तिकै पिढीँमा लगेर किन राखेँ भन्ने छ । यता घाइतेको भने आफूलाई मार्ने नियतले गोली चलाएको आरोप छ ।’
प्रहरीले यस घटनामा ककससको संलग्नता छ भनेर अनुसन्धान भइरहेको जनायो ।
पोखरा मनिपालले आईसीयूमा उपचार गरेपछि आँखामा समस्या रहेको, आँखामाथि पनि चोट परेको बताउँदै थप उपचारका लागि हिमालय आँखा अस्पताल रिफर गरेको थियो । हिमालयले त्रिवि शिक्षण अस्पताल पठायो । त्यहाँ बेड खाली नभएपछि रेग्मीलाई उपचारका लागि ललितपुरस्थित पाटन अस्पताल लगिएको प्रहरीले जनाएको छ ।
