गोरखा — असार २४ गते रसुवाको भोटेकोशी नदीमा आएको बाढीमा बेपत्ता गोरखाका दुईजनाको पहिचान तथा सनाखत हुन नसकेको प्रहरीले जनाएको छ ।
बाढीमा परी गोरखाका दिलबहादुर तामाङ र धनबहादुर विक बेपत्ता बनेका थिए । उनीहरु गोरखाको पालुङटार नगरपालिका–६ का भनिए पनि आफन्त सम्पर्कमा नआएको जिल्ला प्रहरी कार्यालय गोरखाका डीएसपी इन्द्रप्रसाद सुवेदीले बताए । उनिहरु रसुवागढी भन्सार कार्यालय टिमुरेमा कन्टेनर डिब्बा चालकको रुपमा कार्यरत थिए ।
बाढीमा बेपत्ता भएकाहरुको खोततलासका क्रममा विभिन्न व्यक्तिको शव फेला परेको र लास जाँच प्रकृति मुचुल्का समेतको कार्य गरी रसुवा जिल्ला अस्पतालको शव गृहमा राखिएको प्रहरीले जनाएको छ । तर शवको हालसम्म पनि सनाखत हुन नसकेको सुवेदीले बताए । ‘गोरखा घर भनिएको छ तर मृतकको आफन्त तथा नातागोतासमेत सम्पर्कमा आउनुभएको छैन,’ उनले भने, ‘गोरखा पालुङटार–६ भनिएका दिलबहादुर तामाङ र धनबहादुर विकका बारे सो क्षेत्रमा पनि बुझ्यौं, कोही आफन्त सम्पर्कमा नआएपछि आसपासको अन्य वडामा पनि हुन सक्ने भएकाले सबैलाई उहाँहरुको वास्तविक ठेगाना पत्ता लगाउन सहयोगका लागि अनुरोध गरेका छौं ।’
