नवलपरासी — बढी तौल बोकेको मालवहाक गाडी गुडाएका कारण करिब एक महिनाअघि भाँच्चिएको चोरमारास्थित गिरुबारी खोला पुलमा अब ४० टनभन्दा बढी तौलका गाडी वारपार गराउन नपाइने भएको छ ।

एक महिना अघि बढी तौल भएका गाडी गुडेकै कारण भाँच्चिएको पुलमा मर्मतपछि शुक्रबार साँझदेखि यातायात सुरु भएको हो ।

मर्मत गरेर सञ्चालन गरिएको पुलमा अबदेखि ४० टनभन्दा बढी तौल बोकेका गाडी गुडाउँदा फेरि पनि पुल भाँच्चिने जोखिम रहेको सडक विभागले जनाएको छ ।

५२ वर्षअघि निर्माण गरिएको पुल अहिले पनि जीर्ण अवस्थामै रहेको भन्दै त्योभन्दा बढी तौल, भारसहितका गाडी लैजाँदा कुनैपनि बेला फेरि पुल भाँच्चिन सक्ने सडक विभागले जनाएको छ ।

सडक विभागले पुलका दुवै किनारमा साइन बोर्ड टाँसेर चोरमाराको गिरबारी खोला पुलमा ४० टनभन्दा बढी गह्रुँगा गाडी लैजान नपाउने जनाउ दिएको छ ।

पुल नजिकै नेपाली भाषामा लेखिएका साना अक्षरमा संकेतले भारतीय गाडीका चालकले नबुझ्ने भएकाले त्यहाँ बढी तौलका भारतीय गाडी आउजाउ हुने सम्भावना कायमै छ । पुलको अन्तिम खम्बा नजिक साना अक्षरमा लेखिएका कारण चालकले थाहै नपाउने अवस्था छ ।

त्यहाँ दिनहुँ ४० टन वा त्योभन्दा धेरै तौल बोकेका भारतीय गाडी आउने गर्छ ।

२ सय १६ मिटर लामो चोरमारा खोलाको फलामे पुल मर्मतसम्भार गरेर यातायात सञ्चालन गरिएपनि जीर्ण पुल भएका कारण जोखिम भने उत्तिकै छ । एक महिना अघि त्यहाँ बढी तौल बोकेका मालवहाक गाडीसहित लामो जाम पर्दा पुल भाँच्चिएको थियो ।

पुल भाँच्चिएको स्थानमा नयाँ फलामे पाता फेरेर आवागमन खुलाइएपनि पुलको अवस्था जोखिमपूर्ण नै रहेको ठेकेदार तारा पौडेलले जानकारी दिए । 'अहिले मर्मत गरिएको बाहेक स्थानमा पुल जीर्ण नै रहेकाले जोखिम उस्तै छ,' पौडेलले भने, 'पूरै पुलमा नयाँ फलामको पाता फेरेको होइन त्यसैले जोखिम बढ्दो छ ।'