पोखरा — बैजनी रंगको पहिरनमा २० युवती शुक्रबार पोखराको छोरेपाटनमा रहेको मानवसेवा आश्रम पुगे । आश्रममा सडकबाट उद्धार गरिएका महिलाका हात–खुट्टा सफा गरिदिए । नङ काटिदिए । कपाल मिलाइदिए । ‘मेनिक्योर, पेडिक्योर र हेयर कट’पछि मानवसेवा आश्रमका आमा चिटिक्क देखिए । 

पोखरा महानगरपालिकाको सहयोगमा सहायक ब्युटिसियन तालिम लिइरहेका प्रशिक्षार्थी मानवसेवा आश्रममा पुगेका हुन् । विरौटाको ड्रिम ब्युटी होम एन्ड ट्रेनिङ सेन्टरमा तालिम लिइरहेका उनीहरूले तीन महिने तालिमको अन्तिममा आश्रममा पुगे । मानसिक सन्तुलन गुमाएका, सुस्त मनस्थितिका र असहाय महिलालाई सिंगारे । मेनिक्योर, पेडिक्योर र कपाल काट्न पाएर आश्रमका आमा दंग देखिए । 

ट्रेनिङ सेन्टरकी सञ्चालक एवं प्रशिक्षक शान्ता लामिछानेले आफ्नो जन्मदिन आश्रममा मनाइन् । उनले महिलालाई आवश्यक सेनिटरी प्याड, सरसफाइका सामग्री, दिवा खाजा पनि सहयोग गरिन् । ‘आश्रममा खाद्यान्न, लत्ताकपडा सहयोग प्राप्त भइरहको हुन्छ,’ उनले भनिन्, ‘यहाँ आउँदा आफूले जानेको सीपको उपयोग पनि गर्नुपर्छ भनेर मेनिक्योर, पेडिक्योर र हेयर कट गरिदियौं ।’ 

२०७४ चैत १७ मा नवौं शाखाका रूपमा छोरेपाटनमा खोलिएको आश्रममा पहिला महिला र पुरुष आश्रित थिए । ०७९ भदौ १३ देखि भने महिला मात्रै राखिएको छ । पुरुषलाई पोखराकै हेमजा शाखामा सारिएको छ । आश्रमको व्यवस्थापन हेरिरहेकी समर्पित अभियन्ता सम्झना गर्तौलाका अनुसार छोरेपाटनमा हाल २५ देखि ८५ वर्षसम्मका ८० जना महिला र १० जना बालबालिका छन् । केही बालबालिका आमासँगै आश्रममा आएका हुन् भने केही आश्रममै जन्मिएका हुन् । ‘महिला र पुरुषसँगै राख्दा समस्या आएकाले पनि छुट्याउनुपरेको हो,’ उनले भनिन्, ‘अहिले पुनर्स्थापित गरेर सीप सिकाउनतिर जोड दिएका छौं ।’ पोखरामा हालसम्म एक हजार जना भन्दा बढीको उद्धार गरेको र तीमध्ये ५ सय जनालाई पारिवारिक पुनर्मिलन गराएको उनले सुनाइन् । 

पोखराको आश्रममा हाल कास्की, तनहुँ, स्याङ्जा, म्याग्दीबाट उद्धार गरेर राखिन्छ । हेमजा शाखामा १ सय ४० पुरुष आश्रित छन् । गोरखा, लमजुङ र बागलुङमा आश्रमको आफ्नै शाखा छ । छोरेपाटनमा भाडाको घरमा आश्रम चलिरहेको छ भने हेमजामा आफ्नै भवन रहेको छ । गण्डकी प्रदेशले आर्थिक वर्ष ०७८/०७९ मा सडक मानवमुक्त प्रदेश घोषणा गरेको थियो । 

आत्मनिर्भर बन्न सौन्दर्यकर्म

पोखरा महानगरपालिकाको व्यवसाय प्रवर्द्धन केन्द्रको सहयोगमा हाल २० जनाले सहायक ब्युटिसियन तालिम लिइरहेका छन् । ड्रिम ब्युटी होम एन्ड ट्रेनिङ सेन्टरमा सौन्दर्यकर्मी सुनीता गुरुङ र शान्ता लामिछानेले तालिम दिइरहेका छन् । 

प्रशिक्षक गुरुङले आर्थिक अवस्था कमजोर भएका महिलालाई छनोट गरी महानगरले तालिम प्रदान गरेको बताइन् । उनका अनुसार ६५ दिनसम्म ३ सय ९० घण्टा तालिम सञ्चालन हुन्छ । ‘सौन्दर्यकर्मी बन्न यो आधारभूत तालिम हो,’ उनले भनिन्, ‘तालिमपछि स्वयंसेवक रूपमा काम गर्ने र थप तालिम लिएपछि आफैं पार्लर खोल्न सक्ने अवस्थामा प्रशिक्षार्थी पुग्नेछन् ।’ नेल आर्ट, माइक्रोब्लेडिङका लागि भने छुट्टै तालिम लिनुपर्छ । पोखरामा सौन्दर्यकर्मी तालिम लिन बुटवल, काठमाडौं, चितवन लगायत अन्य सहरबाट पनि आउने गरेको उनले सुनाइन् । ‘पोखरामा विशेषज्ञ र अनुभवी सौन्दर्यकर्मी छन्, त्यसैले पनि तालिम लिनेको रोजाइमा पर्छ,’ उनले भनिन् ।