बागलुङ — जैमिनी नगरपालिकाले हाल नगरपालिका केन्द्रदेखि जैमिनीधाम जाने सडकछेऊमै फोहोर फालेको छ। यो फोहोरले ठेउलेखोला प्रदुषित बनेको छ। उक्त फोहोर बगेर जाँदा कालीगण्डकीमा समेत असर पर्छ ।

जग्गा नपाएपछि नगरपालिकाले फोहोर व्यवस्थापनमा चुनौती व्यहोरेको धेरै वर्ष भयो । निर्माणाधिन कुश्मीसेरा जैमिनीधाम सडक चौडा पार्दा फोहोरले सडकमा यात्रा गर्नेलाईपनि असर पर्न थालेको स्थानीयले गुनासो गरे ।

हाल जैमिनी धाम देखि कुश्मीसेरा जाने सडक निर्माणाधिन छ । सडक चौडा र स्तरीय बनाउने क्रममा उक्त फोहोर फाल्ने स्थानपनि भत्किएको छ । अब फोहोरको व्यवस्थापनमा नगरपालिकालाइ थप चुनौती थपिएको छ । सडक चौडा पार्दा फोहोर सबै खोलामा जाने खतरा छ । 

फोहोरको व्यवस्थापनकालागि पहल भैरहेपनि व्यवस्थापनमा ढीलाई भएको नगर प्रमुख नरबहादुर पुनले बताए । ‘हामीले जग्गा त हेरिसकेका छौं, सुरक्षित स्थान पनि छ, तर नगरको नाउँमा पास गर्न अप्ठ्यारो भयो’ पुनले भने, ‘उक्त जग्गामा सडक पनि लैजादै छौँ।’

नगरपालिकाको वडा नं ५ मा रहेको खोंचमा जग्गा व्यवस्थापन भैसकेको उनले बताए । औपचारिकता दिन बाँकी हुँदा फोहोर फाल्न ढिला भएको हो । ‘तत्काल फोहोरको दुर्गन्ध पनि नआउने, खोला र सडकमा पनि फाल्नु नपर्ने स्थान भेटेका छौं, त्यसलाई औपचारिकता दिन बााकी छ,’ पुनले भने, कम्तिमा ३० वर्षका लागि ४ रोपनी जमिनको व्यवस्थापन भएको हो ।’ थप जग्गा नगरकै नाउँमा किन्ने प्रकृया भने लामो भएको हो । उक्त जग्गा थोरै भएकोले थप खोजी भइरहेको पुनले बताए ।