कास्की — नेकपा (एमाले)का वरिष्ठ उपाध्यक्ष ईश्वर पोखरेलले चैत १५ मा काठमाडौंको तीनकुनेमा भएको हिंसात्मक घटनामा पूर्वराजा ज्ञानेन्द्र शाहलाई नागरिकले गरेको गल्तीसरह दण्ड गरिने बताएका छन् ।

शनिबार पार्टी जिल्ला कमिटी कास्कीले आयोजना गरेको जागरण सभालाई सम्बोधन गर्दै उनले देशलाई द्वन्द्व र हिंसामा लैजान खोजिएको विषय सरकारले राम्रोसँग बुझेको बताए । ‘एउटा नागरिकले जसरी गलत काम गरेबापत दण्डको भागिदार हुनुपर्छ त्यस्तै किसिमले दण्डको भागिदार (पूर्वराजालाई) बनाउने छौं,’ पोखरेलले भने ।

तीनकुने घटनाको मुख्य योजनाकार पूर्वराजा शाह नै भएको पोखरेलले दाबी गरे । चैत १५ को प्रदर्शनको उद्देश्य नै हत्या, हिंसा, तोडफोड र आगजानी रहेको उनले जिकिर गरे । ‘त्यो कार्यक्रम हत्या, हिंसा, तोडफोड, आगजानीका उद्देश्यका साथ आयोजना गरिएको थियो,’ पोखरेलले भने, ‘त्यो सम्पूर्ण कामको जवाफदेही, त्यसको योजनाकार, मास्टरमाइन्ड पूर्वराजा ज्ञानेन्द्र थिए जसलाई अब यथोचित प्रक्रियाबाट छानबिन हुन्छ भन्ने कुरा म जानकारी गराउन चाहन्छु ।’ अराजकतावादलाई सघाउने र मलजल गर्ने काम गर्नु उचित नहुने पोखरेलको भनाइ छ ।