कास्की — गण्डकी प्रदेशका मुख्यमन्त्री सुरेन्द्रराज पाण्डेले निर्मल निवासमै बस्न नपाउनेसम्मको परिस्थिति आउनेबारे सोच्न पूर्वराजा ज्ञानेन्द्र शाहलाई चेतावनी दिएका छन् । आगजनीसहित उच्छृङ्खल गतिविधिले त्यस्तो परिस्थिति आउन सक्ने उनको भनाइ थियो ।

‘देशको परिस्थितिअनुसार सम्बोधन गर्न नसकिएका असन्तुष्टिका स्वरलाई लिएर संविधान उल्टाउँछु, संघीयता, गणतन्त्र खारेज गर्छु, फेरि नारायणहिटीमा आएर बस्छु भनेर २/४ वटा घर जलाउन लगाउने, १०/२० वटा गाडी जलाउन लगाउने उच्छृङ्खल कार्य गर्ने हो भने दरबारमार्गको राजदरबार होइन, महाराजगञ्जको निर्मल निवासमा पनि बस्न पाइन्छ कि पाइँदैन भन्ने यस्ता क्रियाकलाप गर्नेले सोच्नुस्,’ मुख्यमन्त्री पाण्डेले भने । 

राजतन्त्र ल्याउँछु भन्नु दिवा सपना भएको मुख्यमन्त्री पाण्डेले टिप्पणी गरे । ‘यो गणतन्त्र ल्याउने र राजतन्त्र फाल्नेमा जुत्ता खियाएका, पसिना बगाएका, रगत बगाएका मानिस हामी आज पनि जिउँदै छौं,’ उनले थपे, ‘हामी जिउँदो रहिरहेको अवस्थामा कसैलाई राजतन्त्र ल्याउँछु भन्ने लाग्छ भने त्यो दिवा सपना हो । कदापि पूरा हुन सक्दैन ।’

आइतबार गण्डकी प्रदेशसभा बैठकमा बोल्दै उनले ‘भड्किएका दल’ राजवादीले गर्दा एक ठाउँमा उभिने परिस्थितिसमेत बनेको बताएका छन् । गणतन्त्रमाथि धावा बोलेपछि दलहरू सोच्न बाध्य भएको उनको भनाइ थियो ।