बागलुङ — मंगलबार सम्पन्न भएको स्वतन्त्र विद्यार्थी युनियनको निर्वाचनमा बागलुङको एक आंगिक र तीन सामुदायिक क्याम्पसको परिणाम आएको छ ।

ती मध्ये धौलागिरि बहुमुखी क्याम्पसमा अनेरास्ववियु, गलकोट बहुमुखी क्याम्पसमा अखिल क्रान्तिकारी, शान्तिदीप बहुमुखी क्याम्पसमा नेविसंघ र सर्वोदय क्याम्पसमा अखिल छैटौंका उम्मेदवार सभापतिमा निर्वाचित भएका छन् । 

धौलागिरि बहुमुखी क्याम्पसमा अखिलबाट सभापति र सदस्यमा एक जनाले जितेका छन् भने बाँकी पदाधिकारी र सदस्यहरुमा नेविसंघका उम्मेदवार विजयी भएका छन् । 

यहाँ नेविसंघ एक्लै लडेको थियो भने अनेरास्ववियु, अखिल क्रान्तिकारी, अखिल छैटौं, अखिल समाजवादी र राष्ट्रिय प्रजातानित्रक विद्यार्थी युनियन ‘अखिल संयुक्त प्यानल’ बनाएर लडेका थिए । 

धौलागिरिमा अखिल संयुक्तको तर्फबाट अनेरास्ववियुकी आस्मिन शेख सभापतिमा निर्वाचित भएकी हुन् । कूल १ हजार ५९ मत खसेकोमा शेखले ५ सय ५२ मत ल्याइन् । नेविसंघकी सृष्टी आचार्यले ४ सय ९१ मत पाइन् ।

सचिव, कोषाध्यक्षमा नेविसंघ विजयी भए । सचिवमा नेविसंघका सचिन हरिजनले ५ सय ३४ मत पाएर विजयी भए भने अखिल संयुक्तका रुद्रबहादुर पुनले ५ सय ९ मत पाए । कोषाध्यक्षमा नेविसंघका विशाल घर्ती ६ सय ५४ मत ल्याएर विजयी भए । 

अखिल संयुक्तकी रेशा शर्माले ३ सय ८४ मत पाइन् । ६ सदस्यमा ५ जना नेविसंघका र एकजना संयुक्तका निर्वाचित भए । 

२०१९ सालमा स्थापना भएको धौलागिरि बहुमुखी क्याम्पसमा पहिलो पटक महिलाबीच नै सभापतिका लागि चुनाव भएको थियो । शेख स्नातकोत्तर प्रथम वर्षकी विद्यार्थी हुन् । सदस्यहरुमा नेविसंघका प्रशान्त सुवेदी, दीप सागर सुवेदी, सुदीप घर्ती, सृष्टी घर्तीमगर, सुवास बाबु घर्ती र अखिलका विकल्प घर्ती निर्वाचित भए ।

समानुपातिकतर्फ भने नेविसंघ पहिलो भयो । नेविसंघले ४ सय २१ मत पाउँदा अखिलले २ सय ७७ मत पायो । अखिल क्रान्तिकारीले १ सय ५, अखिल छैटौंले ७७ मत पायो भने राप्रविसंघले ५१ र स्वतन्त्र विद्यार्थी समूहले १ सय २२ मत पायो ।