काठमाडौँ — नेपाल प्रहरिको 'प्रहरी विशेष कला तथा कारबाही (कमान्डो) तालिमअन्तर्गत दसौं समूहमा तालिमरत प्रहरीहरुले कुश्मास्थित 'द क्लिफ'मा आइतबार बन्जी जम्प गरेका छन् ।

तालिम संयोजक प्रहरी नायब उपरीक्षक गणेशबहादुर बरालको संयोजनमा क्लिफमा प्रहरीहरूलाई बन्जी जम्प गराइएको महाविद्यालयका प्राचार्य प्रहरी वरिष्ठ उपरीक्षक दीपशमशेर जबराले जानकारी दिए । 

'भविष्यमा आइपर्ने जस्तोसुकै अवस्थाका लागि कमान्डोहरुलाई तयार गर्न साहसिक गतिविधिमा संलग् गराइएको हो,' प्रहरी वरिष्ठ उपरीक्षक जबराले भने, 'नेपालमा मात्र नभई विदेशमा समेत सेवा विस्तार गरिरहेको द क्लिफको प्रोफेसनल टिमका कारण केही वर्षदेखि निरन्तर द क्लिफसँग सहकार्य गर्दै आएका छौं ।'

तालिमअन्तर्गत १ सय ६ जना प्रशिक्षार्थी प्रहरीले बन्जी जम्प गरेका छन् । नेपाल प्रहरीले तालिमरत प्रहरीलाई विभिन्न साहसिक खेलमा सहभागी गराउँदै आएको छ ।