लमजुङ — लमजुङको मर्स्याङ्दी गाउँपालिका २, प्रोबीका सन्तबहादुर तामाङको घरमा आगलागी हुँदा एकतले कच्ची घरसहित घरभित्रका सबै सामान जलेर नष्ट भएको छ । प्रहरीका अनुसार आइतबार साँझ गुन्द्रीबाट सल्किएको आगो घरमा लाग्दा घर, घरभित्र रहेका अन्नपात, लत्ताकपडा, भाँडावर्तन, टिभी, मोबाइल लगायत सामान जलेर नष्ट भएको हो ।

जिल्ला प्रहरी कार्यालयका प्रहरी निरीक्षक अभिषेक पाण्डेका अनुसार आगलागीबाट घरसहित सवै सामान जल्दा ७ लाख ५० हजार रुपैयाँ राबरको धनमाल नष्ट भएको जानकारी आएको छ । आइतबार साँझपख नातीले लाइटर खेलाउँदा गुन्द्रमा लागेको आगो घरमा सल्किएर आगलागी भएको बुझिन आएको प्रहरीले जनाएको छ ।

यसैबीच, मर्स्याङ्दी गाउँपालिका ३, सिउरुङमा रहेको भेडीगोठमा आगलागी भएको प्रहरीले जनाएको छ । सोमबार बिहान साढे ८ बजेतिर गोठभित्रको चुल्होबाट सल्किएको आगोले स्थानीय गणेशबहादुर गुरुङको भेडीगोठ पूर्ण रूपमा जलेको प्रहरीले बताएको छ ।