पोखरा — रेस्टुरेन्ट एन्ड बार एसोसियसन (रेवान) पोखराले लेकसाइडमा आयोजना गर्ने पोखरा सडक महोत्सवको २६ औं संस्करण आगामी पुस १३ देखि १७ सम्म हुने भएको छ । अंग्रेजी नयाँ वर्षको अवसर पारेर गन्तव्यस्थलका रूपमा पोखरालाई प्रवर्द्धन गर्ने उद्देश्यले लेकसाइडको तीन किलोमिटर क्षेत्रमा यो महोत्सव हुन लागेको हो ।

रेवान पोखराले ‘सडकमै खाऔं, सडकमै नाचौं, सडकमै रमाऔं’ भन्ने नाराका साथ हरेक वर्ष महोत्सव आयोजना गर्दै आएको छ ।

सोमबार पोखरामा आयोजित पत्रकार सम्मेलनमा महोत्सव संयोजक विकास भट्टराईले बसुन्धरा पार्कदेखि गैह्राको चौतारासम्मको क्षेत्रमा सडक महोत्सव आयोजना हुने जानकारी दिए । उनका अनुसार महोत्सवको मुख्य आकर्षणका रूपमा विभिन्न जातजातिका लोपोन्मुख सांस्कृतिक कार्यक्रम, मौलिक वेशभूषा प्रदर्शन, झाँकी प्रदर्शन प्रतियोगिता, राष्ट्रिय तथा अन्तर्राष्ट्रिय खानाको प्रदर्शन, लाइभ कन्सर्ट रहेका छन् । खेलकुदतर्फ डुंगा दौड, वेटर दौड, टग अफ वार, मःम तथा ससेज खाने प्रतियोगिता रहने छन् । 

सचेतनामूलक सडक नाटक र पोखराको पर्यटन प्रवर्द्धन, विकास, अवसर तथा चुनौतीमा केन्द्रित रहेर संवाद कार्यक्रमको पनि आयोजना गरिएको छ । पोखरा सेरोफेरोका स्थानीय उत्पादन, हस्तकला, चित्रकला, मूर्तिकला, कृषि, वनस्पति लगायत उपजलाई प्राथमिकताका साथ प्रदर्शनीमा राखिने संयोजक भट्टराईले बताए । 

महोत्सवका सांस्कृतिक संयोजक चौबहादुर गुरुङले यसपल्ट लमजुङको लोपोन्मुख कृष्ण चरित्र नृत्य र भोजपुरी नृत्यलाई पनि समावेश गरिने बताए । महोत्सवका प्रचारप्रसार संयोजक वीरेन्द्र शेरचनले सडक महोत्सव स्थानीयस्तरमा आर्थिक गतिविधि चलायमान बनाउन, विदेशी मुद्रा आर्जन गर्न र रोजगारी सिर्जना गर्न गतिलो माध्यम बनेको बताए । ‘महोत्सवमा ४ देखि ५ लाख आन्तरिक तथा बाह्य पर्यटकको उपस्थिति हुने गरेको हाम्रो अनुमान छ,’ उनले भने, ‘विशेषगरी भारतीय पर्यटक यो समयमा नयाँ वर्ष मनाउन उल्लेख्य रूपमा पोखरा आउने गरेका छन् ।’