यस फिल्मले आफ्नो पहिलो सप्ताहन्तमै विश्वभरबाट ३० करोड डलर भन्दा बढीको सानदार कमाइ गर्दै फ्रेन्चाइज फिल्मकै इतिहासमा सर्वाधिक ठूलाे ओपनिङ गरेको हो ।
लस एन्जलस — डिज्नी र पिक्सारको चर्चित एनिमेटेड फ्रेन्चाइज ‘टोय स्टोरी ५’ ले बक्स अफिसमा कीर्तिमानी ओपनिङ गरेको छ । गत १९ जुनमा रिलिज भएको यस फिल्मले आफ्नो पहिलो सप्ताहन्त मै विश्वभरबाट ३० करोड डलर भन्दा बढीको सानदार कमाइ गरेको हो । यो यस फ्रेन्चाइजकै इतिहासमा सबैभन्दा उत्कृष्ट ओपनिङ हो ।
यस पाँचौँ शृङ्खलामा मुख्य पात्रहरू वुडी, जेसी र बज लाइटइयरले आफ्नो अहिलेसम्मकै सबैभन्दा ठुलो प्रतिद्वन्द्वी— एउटा 'ट्याब्लेट कम्प्युटर' (डिजिटल ग्याजेट) को सामना गरेका छन् ।
डिज्नी र पिक्सारको उत्कृष्ट पुनरागमन
पछिल्ला केही वर्षहरूमा लगातार व्यावसायिक चुनौतीको सामना गरिरहेका डिज्नी र पिक्सार फिल्म स्टुडियोका लागि यो सफलताले ठूलो राहत मिलेको छ । यो कमाइ यस वर्षकै दोस्रो ठुलो ‘ग्लोबल ओपनिङ विकेन्ड’ बनेको छ ।
यस वर्षको सबैभन्दा ठुलो ओपनिङ भने ‘द सुपर मारियो ग्यालेक्सी मुभी’ को नाममा छ, जसले हालसम्म विश्वभरबाट १ अर्ब डलरभन्दा बढी कमाइसकेको छ । ‘टोय स्टोरी ५’ ले पहिलो सप्ताहन्तमा उत्तर अमेरिकाबाट मात्रै १६ करोड डलर र बाँकी विश्व बजारबाट १५ करोड डलरभन्दा बढीको टिकट बिक्री गर्न सफल भएको छ ।
लागत र बक्स अफिस चुनौती
यो फिल्म करिब २५ करोड डलरको बीग बजेटमा निर्माण भएको बताइएको छ । निर्माण लागतबाहेक मार्केटिङ र अन्य खर्चहरू उठाउनका लागि मात्रै पनि फिल्मले कम्तीमा ५० करोड डलर कमाउनुपर्ने हुन्छ ।
ऐतिहासिक रूपमा पिक्सारका फिल्महरूले आफ्नो लगानी सजिलै सुरक्षित गर्ने गरेका छन् । कतिपय फिल्मले त निर्माण र प्रचार खर्चभन्दा तीन गुणा बढीसम्म कमाइ गरेका छन् । यसअघि पिक्सारका सिक्वेलहरू ‘द इन्क्रेडिबल्स २’ र ‘इन्साइड आउट २’ ले १ अर्ब डलरभन्दा बढीको व्यापार गरेका थिए ।
तर, हालैका वर्षहरूमा यी स्टुडियोका केही फिल्महरू, जस्तै एलियनको कथामा आधारित ‘एलियो’ र टोय स्टोरीको स्पिन-अफ ‘लाइटइयर’ बक्स अफिसमा नराम्ररी फ्लप भएका थिए । डिज्नीको पछिल्लो बीग बजेटको स्टार वार्स स्पिन-अफ ‘द म्यान्डलोरियन एन्ड ग्रोगु’ ले मात्र अहिलेसम्म आफ्नो १६ करोड ५० लाख डलर लागतको दोब्बर अर्थात् ३२ करोड कमाइ गरेको छ ।
बदलिँदो फिल्म बजार र 'टोय स्टोरी' को विरासत
कोभिड-१९ महामारी यता समग्र बक्स अफिसको कमाइमा गिरावट आएको छ । नेटफ्लिक्स र डिज्नी प्लस जस्ता स्ट्रिमिङ सेवा (ओटीटी) तर्फ दर्शकहरूको आकर्षण बढेपछि हलसम्म दर्शकहरूलाई फर्काउन फिल्म स्टुडियोहरूले निकै संघर्ष गरिरहेका छन् । विशेष गरी ठुलो बजेटका फिल्महरूले बक्स अफिसमा अपेक्षाकृत प्रदर्शन गर्न सकेका छैनन् । यसका बाबजुद, ‘टोय स्टोरी’ शृङ्खला पिक्सारकै सबैभन्दा बढी नाफा कमाउने फ्रेन्चाइजमध्ये एक हो । सन् १९९५ मा वुडी र बज लाइटइयरका पात्रलाई दर्शकमा परिचित गराएयता यस फ्रेन्चाइजले विश्वभर ३ अर्ब डलरभन्दा बढी कमाइसकेको छ ।
खेलाौनाहरू जीवित हुने संसारको कथा प्रस्तुत गरेको यसको पहिलो फिल्म (१९९५) ले कम्प्युटर-जेनरेटेड ग्राफिक्स (सीजीआई) को प्रयोगमा क्रान्ति ल्याउँदै पिक्सारलाई शीर्ष एनिमेसन स्टुडियोको रूपमा स्थापित गरेको थियो । यसअघिका तेस्रो र चौथो शृङ्खला दुवैले बक्स अफिसमा १-१ अर्ब डलरभन्दा बढीको व्यापार गरेका थिए ।
