काठमाडौँ — संगीत सिर्जना भनेको केवल नोटहरू लेख्ने प्रक्रिया मात्र होइन। ती नोटहरू श्वास, स्वर, ताल र मानव भावनाले जिएपछि मात्र संगीत जीवित हुन्छ। यही सृजनात्मक सहकारितालाई प्रत्यक्ष अनुभव गराउने उद्देश्यसहित शनिबार राष्ट्रिय सभागृहमा द कम्पोजर’स डेस्क- फर्स्ट एडिसन २०२५ सम्पन्न भयो।

यस संस्करणमा प्रस्तुत कार्यक्रम विश्वसंगीतको स्वरूपमा नेपाली लोकधुनको आत्मालाई सिनेमाटिक स्कोरको गरिमा र आयामसँग संयोजन गरिएको थियो। कार्यक्रमका संगीत संयोजन, स्वरूप र विशेष वाद्यसंयोजन नाम्लो म्युजिक हबका संस्थापक तथा संगीतकार गंगा थापा को कलात्मक दृष्टिकोणबाट प्रेरित थिए।

संगीतकार तथा निर्माता गंगा थापासँगै २५ संगीतज्ञ एउटै मञ्चमा लगभग तीन घण्टा लगातार लोक वाद्यवादन र आधुनिक वाद्यवादनको फ्युजनमा गुन्जियो।

कार्यक्रम ‘जारी’ चलचित्रको संगीतबाट सुरु हुँदै ‘तीनपाते’, कर्णाली क्षेत्रका स्थानीय धुन बौजु, थारू समुदायको ‘सखी री’, र समग्रमा १६ वटा सिर्जनाले सभागृहलाई संगीत यात्रामा डुबायो।

मञ्चमा झन्डै २५ संगीतज्ञहरू मुरलीदेखि सारंगी, मदलदेखि बाँसुरी, ड्रमसेटदेखि स्ट्रिङ सेक्सनसम्म सबैले एकै स्वरमा संगीतकारको दृष्टि र भावलाई जीवन्त बनाए।

गंगा थापा सँगै एइलिन थापा: सेलो, स्वर, फोबी श्रेष्ठ: भायोलिन, ईभा महर्जन: सेलो, रोश्ना शाक्य: भायोलिन, रवी श्रेष्ठ: डबल बेस, स्वर्णिम महर्जन: बाँसुरी, रुपेश शाक्य: बाँसुरी, फ्लुट, परास सुवेदी: मादल, सिजन महर्जन: पर्कसन (तालवाद्य), जोसेफ श्रेष्ठ: गिटार, अश्विन: सारंगी, धन बहादुर गुरुङ: सनई, स्टिभ अरास्तिया: क्ल्यारिनेट र गायक/स्वर कलाकारहरू, शिङ्ग्रोन पुन, पवन गिरी, अंशु र्की, रेश्मा पुन, समिक्षा चौधरी, सन्तोष राना, पार्वती थापा, श्रीति प्रधान सँगै  बालबालिकाहरूले पनि प्रस्तुति दिएका थिए।