काठमाडौं — आज भदौ २७, अर्थात फिल्म ‘अभिमन्यू’ प्रदर्शन हुने दिन । अवस्था सामान्य हुँदो हो त कामेश्वर चौरसिया अभिनित फिल्म ‘अभिमन्यू: च्याप्टर वान’ आजकै दिन(शुक्रबार)देखि प्रदर्शनमा आइसक्थ्यो । तर, जेनजी आन्दोलन र बढ्दो राजनैतिक घट्नाक्रमका कारण यो फिल्मको प्रदर्शन स्थगन भएको छ । अब फिल्म कहिले प्रदर्शनमा आउला ? टुंगो छैन ।
फिल्मका मुख्य कलाकार कामश्वर भने यतिखेर चिन्तामा देखिन्छन् । एक त देशमा आएको उथलपुथल, अर्को आफ्नै अभिनय करिअरको उतारचढाव ! यसअघि कामेश्वरको ‘रेशम फिलिली’ चल्दा भुकम्प आयो । कोरोना हामारीबीच कामेश्वरकै ‘गरुड पुराण’ पर्यो । ‘अभिमन्यू’ प्रदर्शनको अन्तिम तयारीबीच सामाजिक सञ्जाल प्रतिबन्ध भइदियो । धुमधामले प्रचार सुरु गरिसकेको अभिमन्यू टोलीमा तोकिएको मितिमै फिल्म प्रदर्शन गर्ने जोश बाँकी थियो । सामाजिक सञ्जालमाथिको प्रतिबन्धबीच पनि प्रचारका अनेकन उपाय अपनाउँदै फिल्म प्रदर्शन २ दिनअघि जेन-जीको आन्दोलन भयो । आन्दोलनको स्वरुप बदल्दै जाँदा, निर्माण टिमले फिल्मको प्रदर्शन नै स्थगन गर्नुपर्यो ।
