हलेदे–धोबी–सिरिसे–ढाडे सडक रामेछाप हुँदै ओखलढुंगाको पोकलीसम्म जोड्ने प्रमुख सडक हो। यही मार्ग हुँदै दैनिक रूपमा स्थानीय तथा लामो दूरीका सवारी सञ्चालन हुने गर्छन्।

यसैबिच सोही सडकको तिल्पुङ खण्डमा गत आर्थिक वर्षको अन्त्यतिर गरिएको कालोपत्र गुणस्तरहीन भएकाले अहिले सडक थप जोखिमपूर्ण बनेको छ । वडासदस्य आले मगरका अनुसार बागमती प्रदेश सरकारको बजेटमा पूर्वाधार विकास कार्यालय रामेछापमार्फत गौरीशङ्कर–रूपाकाली जेभीले ४.२ किलोमिटर सडक कालोपत्र गरेको थियो।

२०८० असार १८ गतेदेखि सुरु भएको निर्माण २०८२ असारभित्र सम्पन्न भए पनि कालोपत्र एक महिनामै ठाउँ–ठाउँमा उप्किएको, सडक भाँसिएको तथा भित्तामा निर्माण गरिएका संरक्षण संरचना भत्किन थालेका थिए। उनले अहिले पनि सडकका धेरै भाग जोखिममा रहेको दाबी गरे। 'गुणस्तरहीन निर्माणका कारण सडकका धेरै स्थान जोखिममा छन्। कतिपय ठाउँमा बस्तीसमेत जोखिममा परेको छ,' उनले भने, 'निर्माण गरिएका नालाबाट पानी चुहिँदा विभिन्न स्थानमा पहिरो जाने अवस्था बनेको छ। यसबारे पटक–पटक पूर्वाधार विकास कार्यालय रामेछापलाई जानकारी गराए पनि आवश्यक चासो दिइएन।' लगातारको वर्षासँगै सडकको कमजोर संरचनाले थप क्षति निम्त्याएको उनको भनाइ छ।