हेटौंडा — हेटौंडा अस्पतालले हेमोडायलाइसिस सेवा थप विस्तार गरेको छ । डायलाइसिस सेवाको प्रतिक्षामा रहेका बिरामीले पनि अब उपचार पाउने भएका छन् । हालसम्म प्रतीक्षामा रहेका सबै बिरामीलाई नियमित सेवामा समावेश गरेको छ।  

हेमोडायलाइसिस सेवाका लागि प्रतीक्षा सूचीमा रहेका सबै बिरामीलाई सेवा दिने गरी थप सेवा विस्तार गरी सञ्चालनमा ल्याइएको हो । यसअघि अस्पतालमा नियमित डायलाइसिस सेवा लिँदै आइरहेका १ सय २ जनासहित बुधबारदेखि डाइलायसिसको प्रतीक्षा सूचीमा रहेका १ सय १० जना बिरामीलाई नै समावेश गरिएको मदन भण्डारी स्वास्थ्य विज्ञान प्रतिष्ठानका रजिष्ट्रार एव हेटौंडा अस्पतालका अध्यक्ष भीमसागर गुरागाईंले बताए । 

यसअघि डाइलायसिस मेसिनको अभावमा दैनिक ३५ देखि ४० जना बिरामीलाईमात्र सेवा दिँदै आएकोमा अब दैनिक ६० जनालाई सेवा प्रदान सकिने उनले बताए । प्रतीक्षा सूचीमा रहेका बिरामीको उपचार तालिका निर्माण गरेपछि बुधबारबाटै सेवा सुरु गरिएको र हालसम्म आएका बिरामीमध्ये कसैले पनि पालो कुर्नु नपर्ने उनले बताए । 

अस्पतालमा रहेका १४ वटा हेमोडाइलायसिस मेसिनमध्ये ५ वटा नियमित नचल्ने कारणले अधिकांश दिनमा जम्मा ९ वटा मेसिनमात्र प्रयोग हुँदै आएको थियो । प्रतिष्ठानले थप १६ वटा मेसिन खरिद गरेपछि सेवा पर्याप्त गर्न सम्भव भएको हो ।

प्रतिष्ठानको २ करोड र बागमती प्रदेश सरकारको २ करोड गरी कुल ४ करोड लगानीमा १६ वटा मेसिन थप गरेको हो । अब २० वटा मेसिन नियमित चल्ने, २ वटा आकस्मिक डायलायसिस, २ वटा आइसीयू, २ वटा एचआइभी तथा हेपाटाइटिस संक्रमितका लागि चल्नेछन् भने ४ वटा मेसिन बाँकी रहने रजिष्ट्रार गुरागाईंले जानकारी दिए । हाल यस विभागमा २५ भन्दा बढी कर्मचारी कार्यरत रहेका छन् । पत्नीको हेमोडाइलायसिस गराउन आएका हेटौंडा–११ का चन्द्रलाल तामाङले हेटौंडा अस्पतालको सेवाबाट खुसी हुँदै भने,‘स्वास्थ्यकर्मीको पारिवारिक व्यवहार र सेवा विस्तारले आफूहरुलाई सहज भएको छ ।’