सरकारले व्यवस्थित बसोबासको व्यवस्था नगरी डोजर चलाएको भन्दै चितवनमा भूमिहीन सुकुमवासीले जोडदार विरोध प्रदर्शन गर्दै न्यायको माग गरेका छन्।
चितवन — व्यवस्थित बसोबासको व्यवस्था गर्नुको सट्टा भूमिहीन सुकुमवासीहरूको बसोबास क्षेत्रमा सरकारले डोजर चलाएर उठीबास लगाएको भन्दै भरतपुरमा विरोध प्रदर्शन सम्पन्न भएको छ । संयुक्त सुकुमवासी संघर्ष समिति चितवनले आयोजना गरेको विरोध प्रदर्शनका क्रममा बुधबार मध्यान्ह भरतपुर वीरेन्द्र क्याम्पस गेटबाट चितवन जिल्ला प्रशासन कार्यालयसम्म र्याली निस्केको थियो ।
र्यालीका सहभागीहरूले ‘खोइ मानवता, डोजरले पुर्यो’, ‘डोजर आतंक बन्द गर’, ‘सरकार निकास खोज, उठीबास होइन’ जस्ता नारा लगाएका थिए । उनीहरूले महँगी नियन्त्रण गर्न पनि माग गरेका थिए । चितवनमा सरकारले व्यवस्थापन गर्नुपर्ने लगभग ५० हजार घरपरिवार भूमिहीन सुकुमवासी र अव्यवस्थित बसोबास रहेको संघर्ष समितिका संयोजक सती सालले बताए ।
‘हाम्रो मुख्य माग भनेको भूमिहीन सुकुमवासी, भूमिहीन दलित र अव्यवस्थित बसोबासीलाई राज्यले शान्तिपूर्वक व्यवस्थापन गर भन्ने हो । तर यस्तो बस्तीमा डोजर पसेर आतंक मच्चाउन सुरु गरेको छ । अदालतको आदेश पालना भएको छैन । सर्वोच्च अदालतको आदेश विपरीत कोहलपुरमा डोजर चलेको छ,’ उनले भने । सरकार दमनमा उत्रे सशक्त प्रतिकार हुन्छ भनेर खबरदारी सुरु गरेको उनले बताए ।
प्रदर्शनमा सहभागी हुन आएका नरबहादुर गौतम रिक्सा मजदुरी गर्न सिन्धुपाल्चोकबाट चितवन आएका थिए । ‘५५ सालमा चितवन आएँ । रिक्सा चलाएर गुजारा गरेँ । अहिले त मजदुरी पनि गर्न सक्दिनँ । भरतपुर गणेशथानमा बस्छु । चार धुर जग्गा छ । त्यसैको पुर्जा पाए हुने,’ ७३ वर्षका नरबहादुरले भने । पाँच जना बस्ने यो जमिनबाट सरकारले उठाए कहाँ जाने होला भन्ने चिन्तामा छन् उनी ।
भरतपुर पटिहानी राप्ती खोला किनारको सिमलगैरीका बासिन्दा पनि प्रदर्शनमा आएका थिए । सो ठाउँमा लगभग ३० घरपरिवार वर्षौँदेखि बस्दै आएका छन् । ‘नापी भयो, सेतो पुर्जा पाएका छौँ । अब लालपुर्जा पाउनुपर्ने हो । हामीले जे–जति कमायौँ, त्यसले त्यही घर बनायौँ । बिजुली, पानी सबै छ । अब सरकारले नउठाएर वैधानिकता दिए हुने, तर सरकारको भर लागेन,’ प्रदर्शनमा आएका शंकर महतोले भने ।
