रामेछाप — गत फागुन २१ गते सम्पन्न प्रतिनिधिसभा निर्वाचनमा उल्लेखनीय सफलता हासिल गरेको राष्ट्रिय स्वतन्त्र पार्टी (रास्वपा) ले रामेछापमा संगठन विस्तारलाई तीव्रता दिएको छ।

एउटा मात्रै प्रतिनिधिसभा निर्वाचन क्षेत्र रहेको रामेछापमा नेकपा एमाले, नेपाली कांग्रेस र अन्य दलका उम्मेदवारलाई पछि पार्दै गर्दै रास्वपाका डा. कृष्णहरि बुढाथोकी संसद्मा निर्वाचित भएका थिए। उनी हाल संघीय संसद्को अर्थ समितिको सभापतिसमेत छन्।

२ नगरपालिका र ६ गाउँपालिका गरी ६४ वडा रहेको जिल्लामा रास्वपाले वडा तहदेखि संगठन विस्तार अभियान अघि बढाएको छ। पार्टीले हाल धमाधम वडा अधिवेशन गर्दै स्थानीय संरचना सुदृढ पारिरहेको जनाएको छ।

रास्वपा रामेछाप उपसभापति मोहन कार्कीका अनुसार प्रतिनिधिसभा निर्वाचनसम्म जिल्लाका २५ वडामा मात्र अधिवेशन भएको थियो। 'केन्द्रले जेठ १० गतेभित्र सबै वडा अधिवेशन सम्पन्न गर्न निर्देशन दिएको छ,' उनले भने, 'सोहीअनुसार अहिले २८ वडामा अधिवेशनमार्फत नयाँ नेतृत्व चयन भइसकेको छ।'