हेटौंडा — घामपानी दुवै छिर्ने अत्यन्त साँघुरो कतरे छाप्रोमा बस्दै आएका  प्रयास तामाङ दम्पतीले चिटिक्क नयाँ घर पाएका छन् ।'नयाँ घर पाउँदा दंग परेका छौं,' एकै स्वरमा उनीहरूले भने ।

प्रयास र शर्मिला तामाङ दम्पतीलाई हेटौंडा उपमहानगरपालिकाले  कतरे छाप्रोनजिकै जस्तापाताको छाना भएको पक्की घर बनाइदिएको हो । घामपानी दुवै छिर्ने अर्काको कतरे घरमा बस्दै आएका तामाङ दम्पतीको विजोग देखेपछि हेटौंडा उपमहानगरपालिकाले ३ लाख रुपैयाँ लगानीमा घर बनाइदिएको हो । उक्त पक्की  घर हेटौंडा उपमहानगरपालिकाकी प्रमुख मीनाकुमारी लामा र वडाध्यक्ष अनिलकुमार बानियाँले आइतबार एक समारोहबीच उद्घाटन गर्दै तामाङ दम्पतीलाई प्रवेश गराएका हुन् । हेटौंडा उपमहानगरपालिका–१८ मा ५ धुर जग्गामा उक्त घर निर्माण गरिएको हो । 

मकवानपुरकै राक्सिराङ गाउँपालिकाको सरिखेतबाट हेटौंडा उपमहागनगरपालिका–१८ मा अर्काको घरमा बसेका तामाङ दम्पतीका २ छोराछोरी छन् । भूमिहीन तामाङ दम्पतीले टोल छिमेकमा मेला मजदुरी गरेर पेट पाल्दै आएको छ ।  हेटौंडा उपमहागनगरपालिकाले बनाइदिएको पक्की घरमा बस्न पाउँदा आफूहरू निकै दंग परेको उनीहरूले सुनाए । ‘घामपानी नछिर्ने पक्की घरमा बस्न पाउँदा खुसी लागेको छ,’ शर्मिलाले  भनिन्, ‘यस्तो घरमा बस्न पाइएला भन्ने सोचेकै थिएनौं ।’