हेटौंडा — मकवानपुरका दुर्गम र विकट गाउँमा दीर्घरोगी भेटिन थालेका छन् । पहाडी बस्तीका बासिन्दामा पनि मधुमेह र रक्तचापको समस्या पाइएको हो ।

राक्सिराङ गाउँपालिकामा मधुमेह र रक्तचापका बिरामी धेरै भेटिएको राक्सिराङ आधारभूत अस्पतालका चिकित्सक योगेन्द्रमेहर श्रेष्ठले बताए । उनका अनुसार पहाडी बासिन्दामा मोटोपनको समस्या नभए पनि यस्तो रोग भएका धेरै भेटिएका हुन् । गाउँका बासिन्दामा तयारी पेय पदार्थ धेरै पिउने बानी परेकाले पनि यस्ता रोग देखिएको हुन सक्ने उनले बताए । 

‘पानीको सट्टा यहाँका बासिन्दा तयारी पेय पदार्थ पिउँछन्,’ उनले भने, ‘बोतलका पेयमा चिनीको मात्रा धेरै हुन्छ, जसले सुगर र प्रेसर बढाउने गरेको पाइएको छ ।’ उक्त आधारभूत अस्पतालमा स्वास्थ्य परीक्षण गर्न आउनेदेखि बस्तीमा आयोजना गरिने शिविरमा स्वास्थ्य परीक्षण गर्दा पनि मधुमेह, रक्तचाप र हड्डी दुख्ने रोगी धेरै फेला पर्ने गरेको राक्सिराङ गाउँपालिकाअन्तर्गत स्वास्थ्य शाखा प्रमुख विजय कापरीले बताए ।