दोलखा — दोलखाको उच्च हिमाली भेगमा हिमपात र तल्लो भेगमा हिउँदे वर्षा भइरहेको छ । बुधबार दिउँसोबाट पुनः मौषममा भएको बदलीसँगै कालिञ्चोक, बेदिङलगायतका उच्च हिमाली क्षेत्रमा हिमपात भएको हो ।

गत सोमबार पनि दोलखामा तिव्रगतिको हावाहुरीसहति उच्च भेगमा हिमपात भएको थियो । दिन बिराएर वर्षा र हिमपात भएपछि उच्च भेगमा चरनका लागि पुगेका चौंरी गोठ प्रभावित बनेका छन् । चैत अन्तिम सातासम्म हिमपात भएसँगै चिसो बढेको छ । तल्लो क्षेत्रमा आलु गोड्ने बेलामा भइरहको असिनासहितको नियमित वर्षाका कारण किसान फल नलाग्ने चिन्तामा छन् । मकै छरिसकेका किसान भने बारी भिजेका कारण मकैको टुसा पलाउने भन्दै खुसी देखिएका छन् ।

हिमपातपछि कालिञ्चोकका होटल व्यवासयी आन्तरिक पर्यटकको चहलपहल बढ्ने भन्दै उत्साहित बनेका छन् । कालिञ्चोक क्षेत्र घुम्न र दर्शन गएका आन्तरिक पर्यटकका सवारीसाधन हिउँका कारण बाटोमै अलपत्र परेका छन् ।