रामेछाप —  

जिल्लाको हिमाली पालिका उमाकुण्ड गाउँपालिका–५ प्रीतिको उर्माखुमा यात्रुवाहक बस पुगेको छ। गाउँमै पहिलो पटक बस पुगेपछि स्थानीयवासीले खुसी व्यक्त गर्दै तामाङ संस्कारअनुसार बसको पूजा गरी चालक, सहचालक र जनप्रतिनिधिलाई भव्य स्वागत गरेका छन्।

यसअघि उमाकुण्ड–५ को नासपातीघारीसम्म मात्र बस सेवा पुगेको थियो। अब भने बाहुनडाँडा र जिदु हुँदै  उर्माखुसम्म बस सेवा विस्तार गरिएको छ। बस उर्माखुसम्म पुगेपछि स्थानीयवासीले जनप्रतिनिधिलाई धन्यवाद दिँदै सडकलाई व्यवस्थित रूपमा कालोपत्र गर्नुपर्ने मागसमेत गरेका छन्। तामाङ समुदायको बाहुल्य रहेको उर्माखुमा बस सेवा सञ्चालन भएपछि स्थानीयलाई ठूलो राहत भएको उमाकुण्ड गाउँपालिका–५ का वडाध्यक्ष कुलबहादुर बस्नेतले बताए। उनका अनुसार यसअघि गाउँका बासिन्दाले बस चढ्न एक घण्टासम्म पैदल हिँड्नुपर्ने बाध्यता थियो।