मकवानपुर — प्रतिनिधिसभा सदस्य निर्वाचनअन्तर्गत मकवानपुरमा करिब ५५ प्रतिशतभन्दा बढी मतदान भएको प्रारम्भिक अनुमान गरिएको छ ।

प्रमुख जिल्ला अधिकारी वसन्त अधिकारीका अनुसार मतदानको समय सीमा ५ बजेसम्म केही स्थानमा मतदाताहरु लाइन बसेर मतदान गरेको कारण अन्तिम संख्या आउन अझै केही समय लाग्नेछ । 

‘हामी तथ्यांक संकलन गरिरहेका छौं । तर, ५५ प्रतिशतभन्दा बढी मतदान भएको हाम्रो सुरक्षा निकायले तथ्यांक सकंलन गरेका छन्,’ उनले भने ।

२ निर्वाचन क्षेत्र रहेको मकवानपुरमा ३ लाख १५ हजार ३३४ मतदाता रहेका छन् । सबै मतदान केन्द्रमा शान्तिपूर्ण ढंगले मतदान भएको बागमती प्रदेश निर्वाचन कार्यालय हेटौंडाले जनाएको छ । ३७४ वटै मतदान केन्द्रमा शान्तिपूर्ण वातावरणमा मतदान भएको बागमती प्रदेश निर्वाचन कार्यालय हेटौंडाका प्रमुख  हरिप्रसाद ढकालले जानकारी दिए । उनका अनुसार अब क्रमशः मतपेटिका संकलन कार्य सुरु हुनेछ ।