रामेछाप — फागुन २१ गते हुने प्रतिनिधिसभा सदस्य निर्वाचनका लागि रामेछापमा नेपाली सेनाले हेलिकप्टरमार्फत हवाई गस्ती तथा माउन्ट/डिसमाउन्ट अभ्यास सञ्चालन गरेको छ।

मंगलबार बिहान १०:४५ बजे रामेछाप जिल्लाको हिलदेवी आसपासका क्षेत्रमध्ये पूर्व पृतना हेडक्वार्टरमा रहेको विशेष फौज वाहिनीअन्तर्गतका सेनानी सुवास थापाको कमान्डमा उक्त गस्ती तथा अभ्यास गरिएको हो ।

अभ्यासअन्तर्गत हेलिकप्टरमार्फत हवाई रेकी/गस्ती गर्दै आवश्यक स्थानमा फौजको माउन्ट तथा डिसमाउन्ट अभ्यास गरिएको छ ।

आगामी निर्वाचन अवधिमा सम्भावित सुरक्षा चुनौतीको पूर्व तयारी, छिटो प्रतिकार्य क्षमता अभिवृद्धि तथा जिल्लाको शान्ति–सुरक्षा सुदृढ बनाउने उद्देश्यले उक्त गस्ती तथा अभ्यास गरिएको  छ ।  निर्वाचनलाई सुरक्षित र शान्तिपूर्ण रूपमा सम्पन्न गराउन रामेछापस्थित नेपाली सेनाको खड्ग दल गणबाट खटिएका नेपाली सेनाले सुरक्षात्मक गतिविधि निरन्तर जारी राखेको छ ।