रामेछाप — रामेछाप नगरपालिका–६ च्यास्कु बजारमा शनिबार दिउँसो भएको सवारी दुर्घटनामा ४ वर्षीया बालिकाको मृत्यु भएको छ।

शनिबार दिउँसो बागमती प्रदेश ०१–०३१ च ५०७५ नम्बरको डबल क्याब बोलेरो गाडीले ठक्कर दिँदा सोही ठाउँकी अन्दाजी ४ वर्षीया बालिकाको घटनास्थलमै मृत्यु भएको जिल्ला प्रहरी कार्यालय रामेछापले जनाएको हो।

गाडी चालक नभएको अवस्थामा मौका छोपेर एक अटो चालकले बोलेरो चलाउँदा दुर्घटना भएको प्रारम्भिक जानकारी आएको र घटनाबारे थप अनुसन्धान भइरहेको जिल्ला प्रहरी कार्यालय रामेछापका प्रहरी निरीक्षक राजनप्रसाद तिम्सिनाले जानकारी दिए। 

स्थानीयका अनुसार बालिका पसलमा सामान किनिरहेको अवस्थामा बोलेरो गाडी सटरभित्रै छिरेको थियो। दुर्घटनामा केही स्थानीयसमेत घाइते भएका छन्। घाइतेलाई उपचारका लागि रामेछाप अस्पताल लगिएको स्थानीयले बताए। घटनाले च्यास्कु बजार क्षेत्रमा शोक र त्रासको वातावरण सिर्जना गरेको छ।