‘शान्तिका लागि धम्म यात्रा भगवान बुद्ध जन्मस्थल लुम्बिनीसम्म’ भन्ने उद्देश्यका साथ थाइल्यान्डबाट पैदल यात्रामा निस्किएको २२ जना बौद्ध भिक्षुहरुको टोली बिहीबार हेटौंडा आइपुगेको थियो ।
What you should know
हेटौंडा — विश्व शान्तिको कामना गर्दै थाइल्यान्डबाट पैदल यात्रामा निस्किएका २२ जना बौद्ध भिक्षुहरुको टोली हेटौंडाबाट चितवनतर्फ हिँडेको छ ।
‘शान्तिका लागि धम्म यात्रा भगवान बुद्ध जन्मस्थल लुम्बिनीसम्म’ भन्ने उद्देश्यका साथ थाइल्यान्डबाट पैदल यात्रामा निस्किएको २२ जना बौद्ध भिक्षुहरुको टोली बिहीबार हेटौंडा आइपुगेको थियो । थाइल्यान्डको थाम्पाइ विहारका प्रमुख भिक्षु आचान सुफित भन्तेको नेतृत्वमा रहेको टोली बुद्धजन्मस्थल लुम्बिनीसम्म पैदल यात्रामा रहेको छ ।
भारतको आसाम र त्रिपुरा हुँदै नेपाल प्रवेश गरेको यो टोली बुधबार राति बाराको अमलेखगन्जमा बसेको थियो। बिहीबार हेटौंडा आइपुगेको भिक्षुहरुको टोलीलाई हेटौंडास्थित प्रज्ञा महाविहारले आवासको व्यवस्थापन गरेको थियो । विहारका अध्यक्ष पूर्ण शाक्य र नेपाल मगर बौद्ध सेवा समाज मकवानपुरका अध्यक्ष अकबर ठाडा मगरले हेटौंडा–४ कर्राचोकमा भिक्षुहरुलाई स्वागत गरेका थिए । बिहीबार राति हेटौंडामा बसेका भिक्षुहरु शुक्रबार बिहान चितवनतर्फ प्रस्थान गरेका हुन् ।
विश्व शान्तिको कामना गर्दै गत फेब्रुअरी ८ तारिखदेखि गोल्मराज बुद्ध विहारबाट सुरु भएको यो पदयात्रा आगामी फेब्रुअरी २२ तारिखमा कपिलवस्तु पुगेर समापन हुने कार्यतालिका रहेको छ । टोलीमा आइल्यान्डका १५ जना, लाओसका १ जना, भारतका ४ जना र नेपालका २ जना भिक्षु रहेका छन् । यस अभियानमा बाटोमा इच्छुक अन्य भिक्षुह पनि सहभागी हुन पाउने छन् ।
भिक्षु भन्तेले विगत ७ वर्षदेखि विश्वका विभिन्न देशमा धम्म यात्रा गरिँदै आएको र नेपालको यात्रापछि श्रीलंकामा धम्म यात्रा गर्ने बताए ।
बुद्धजन्मभूमिमा आएर बुद्धको पूजा गर्न पाउँदा गर्व महसुस हुने र धम्म यात्रा गर्दा उपासकहरुले पनि पुण्यकर्म गर्न पाउने उनी बताउँछन् । भिक्षु बिहान एक छाक मात्रै खाना खाने र बेलुका जुस, पानी खाएर बस्ने गोल्मराज बुद्ध बिहारका भिक्षु मेधन्करले जानकारी दिए ।
