सडक छेउमा रोकिराखेको कारको खानतलासी गर्दा कारको डिक्कीमा लुकाएर राखेको १० केजी १ सय २४ ग्राम गाँजा फेला परेको प्रहरीले जनाएको छ ।
हेटौंडा — मकवानपुर प्रहरीले मनहरी गाउँपालिका-९ ज्यामिरेवाट १० केजी गाँजासहित तीन भारतीय नागरिकलाई पक्राउ गरेको छ । गाँजा बोकेको भारतीय कार पनि प्रहरीले नियन्त्रणमा लिएको छ ।
हेटौंडा-मनहरी सडक खण्डमा पर्ने ज्यामिरेमा रोकिराखेको यूपी ३२एफएफ ००५५ नम्बरको कार र कार चालक भारत विलेज सिखेडा कवल मुजफरनगर उत्तर प्रदेशका २३ वर्षीय मुसिर, सोही गाडीमा सवार २४ वर्षीय मोहमद जुबेर र भारत अम्बा बिहारका ४४ वर्षीय साबीरालाई प्रहरीले नियन्त्रणमा लिएको हो ।
कारमा गाँजा राखेको इप्रका मनहरीले जानकारी पाएपछि मनहरीबाट प्रहरी टोली आएर सडक छेउमा रोकिराखेको कारको खानतलासी गर्दा कारको डिक्कीमा लुकाएर राखेको १० केजी १ सय २४ ग्राम गाँजा फेला परेको थियो । प्रहरीले गाँजा, कार र तीन जना भारतीय नागरिकलाई नियन्त्रणमा लिएको प्रहरी नायब उपरिक्षक एवं प्रवक्ता पुस्कर बोगटीले बताए ।
