रामेछाप — आगामी फागुन २१ गते हुने प्रतिनिधिसभा निर्वाचन सुरक्षाका लागि माग गरिएको निर्वाचन प्रहरीमा रामेछापमा अपेक्षित आवेदन नपरेपछि आवेदन समयावधि दुई दिन थप गरिएको छ ।

जिल्ला प्रहरी रामेछापका प्रहरी निरीक्षक राजनप्रसाद तिम्सिनाका अनुसार निर्वाचन सुरक्षाका लागि नेपाल प्रहरीतर्फ १ हजार ३३३ जना निर्वाचन प्रहरी आवश्यक छन् । सशस्त्र प्रहरी तर्फ ९६ जना आवश्यक छन् ।

सोही अनुसार गत पुस २५ देखि माघ १ गतेसम्म आवेदन आह्वान गरिएको थियो । तर तोकिएको समयभित्र आवश्यक सङ्ख्यामा आवेदन नपुगेपछि माघ ३ गते शनिबारसम्म आवेदन दिन सकिने गरी म्याद थप गरिएको हो ।

उनका अनुसार माघ १ गतेसम्म ७ सय ७९ जनाको आवेदन परेको थियो । जसमा ५७६ पुरुष र २०३ जना महिला छन् । 

निर्वाचन आयोगको निर्देशनअनुसार निर्वाचन अवधिभर शान्ति सुरक्षा कायम गर्न अस्थायी रूपमा निर्वाचन प्रहरी परिचालन गरिने व्यवस्था छ । तर यस पटक रामेछापमा युवाहरूको सहभागिता अपेक्षा अनुसार देखिएन । म्याद थपपछि शुक्रबार दिउँसोसम्म आवेदन दिनेको सङ्ख्या ८ सयभन्दा बढी पुगेको प्रहरी निरीक्षक तिम्सिनाले जानकारी दिए । 'अहिलेसम्म ८ सय प्लस भइसकेको छ, भोलिसम्म म्याद छ, आवश्यक सङ्ख्या पुग्ने आशा छ,' उनले भने ।