चितवन — फागुन २१ को निर्वाचनका लागि चितवनमा शुक्रबार बिहान मुख्य निर्वाचन अधिकृतको कार्यालय खुलेको छ ।

तीन निर्वाचन क्षेत्र रहेको चितवनमा क्षेत्र नम्बर २ को भरतपुरमा मुख्य निर्वाचन अधिकृतको कार्यालय र खैरहनी र रामपुरमा क्रमश: क्षेत्र नम्बर १ र ३ को निर्वाचन अधिकृतको कार्यालय रहने छ ।

भरतपुरमा रहेको उद्योग तथा वाणिज्य कार्यालपमा मुख्य निर्वाचन अधिकृत रहेका चितवन जिल्ला अदालततका न्यायाधीश केदारनाथ पौडेल, चितवनका प्रमुख जिल्ला अधिकारी गणेश अर्याल, सुरक्षा निकायका जिल्ला प्रमुखहरू, जिल्ला निर्वाचन अधिकारी र अन्य निर्वाचन क्षेत्रका निर्वाचन अधिकृतहरूको उपस्थितिमा कार्यालय उद्घाटन भएको छ । 

क्षेत्र नम्बर १ को निर्वाचन अधिकृतको कार्यालय खैरहनीमा रहेको भूमिगत जलस्रोत तथा सिँचाइ विकास डिभिजन कार्यालयमा रहने छ । क्षेत्र नम्बर १ को निर्वाचन अधिकृत विकास रजक तोकिएका छन् । रामपुर कृषि तथा वन विज्ञान विश्व विद्यालय परिसरमा रहने क्षेत्र नम्बर ३ को निर्वाचन अधिकृतको कार्यालयको निर्वाचन अधिकृत बालकृष्ण निरौला रहेका छन् ।

निर्वाचन आयोगको कार्य तालिका अनुसार आज देशभर मुख्य निर्वाचन अधिकृत तथा निर्वाचन अधिकृतको कार्यालय स्थापना हुनेछन् । त्यसै गरि माघ ६ गते उम्मेदवार मनोनयन दर्ता हुने आयोगको कार्यसूची छ । जिल्ला निर्वाचन कार्यालयका निर्वाचन अधिकारी भीमसेन कार्कीका अनुसार जिल्लाभर कुल मतदाता चार लाख ४२ हजार ४२ छन् ।