चितवन — मकर स्नान गर्न देवघाट आउनेले प्लास्टिकका झोला नल्याउन देवघाट क्षेत्र विकास समितिले अपिल गरेको छ । ‘प्लास्टिक ल्याएर आस्थाको धरोहरलाई धुमिल नबनाऊँ,’ समितिका अध्यक्ष ईश्वरीराज लौडारीले भने ।

समितिले मकर स्नान मेलाका बारेमा जानकारी दिन मंगलबार देवघाटमा पत्रकार सम्मेलन आयोजना गरेको थियो । मुक्तिनाथ क्षेत्र दामोदर कुण्डबाट बग्दै आएको कालिगण्डकी र गोसाइँकुण्डबाट बग्दै आएको त्रिशूली नदीको संगमस्थल देवघाटमा मकर स्नान गर्न माघे संक्रान्तिको अघिल्लो दिनबाट देशका विभिन्न ठाउँ र सीमावर्ती भारतीय गाउँबाट पनि भक्तजन यहाँ आउने गर्दछन् ।

देवघाट क्षेत्र विकास समितिले देवघाटलाई पुस ११ गते प्लास्टिक निषेधित क्षेत्र घोषणा गरेको थियो । ‘यसको कार्यान्वयन जटिल विषय हो । तर फोहोरले पवित्र नदी र धार्मिक स्थललाई समस्याग्रस्त बनाएको थियो । सुरुवात गर्नै पर्ने थियो । अभियानका रूपमा सुरुवात भएको हो । यसमा सबैले सहयोग गर्नुपर्ने हुन्छ,’ समितिका अध्यक्ष लौडारीले भने । 

फोहर व्यवस्थापनका लागि डस्टबिनहरू राखेको र अझै थप्दै जाने क्षेत्र विकास समितिका कार्यकारी निर्देशक सदन बरालले बताए । मकर स्नानका लागि तीन लाखभन्दा बढी देवघाट आउने गर्छन् । यातायात व्यवस्थापनदेखि सुरक्षाका धेरै काम पूरा भएको उनले जानकारी दिए । देवघाटधाममा रहेको झोलुङ्गे पुल मर्मत गरेको, नदी तरेर आउन चाहनेका लागि ५० वटा डुंगा राखेको पनि उनले बताए ।