सिन्धुपाल्चोक — बलेफी गाउँपालिका जलविरे माथिल्लो भेगका ७० वर्षीय धर्मदत्त पौड्याल बुधबार सात वर्षपछि नातिनातिनाको अनुहार प्रष्ट देख्दा उनी भक्कानिए ।

मोतीबिन्दुको सफल शल्यक्रियापछि आँखाको पट्टी खोल्दा उनी स्वास्थ्यकर्मीको अगाडि भावुक देखिए। 

सात वर्षअघि भीरबाट लडेर आँखामा चोट लागेपछि उनको क्रमशः दृष्टि गुम्दै गएको थियो । उमेरसँगै बढेको मोतीबिन्दुको समस्याले उनी झण्डै दृष्टिविहीनजस्तै बनेका थिए । आर्थिक अभाव र अस्पतालसम्म पुग्न नसक्दा उनी वर्षौं अन्धकारमै बाँच्न बाध्य भए । ‘दुवै आँखा बन्दजस्तै थिए, सात वर्षपछि उज्यालो देखें,’ उनले भने । 

बाह्रबिसे नगरपालिका–२ कर्थलीका ७८ वर्षीय साङबहादुर तामाङले पनि तीन वर्षपछि आँखा देखे । मंगलबार शल्यक्रिया गरेर ज्योति फर्किएपछि उनले हर्षित हुँदै सबैलाई नमस्कार गर्न भ्याए । ‘आँखा नहुँदा जिन्दगी अँध्यारो हुन्छ । आँखानै सबैभन्दा ठूलो साथी रहेछ,’ उनले उपचारमा संलग्न सबैप्रति कृतज्ञता व्यक्त गरे ।

बाह्रबिसे नगरपालिकामा आयोजित निःशुल्क आँखा शिविरबाट फौड्याल र तामाङजस्तै एकसय २० जनाले मोतीबिन्दुको शल्यक्रिया गराएका छन् । लठ्ठीको सहारामा शिविर आएका बृद्धबृद्धा शल्यत्रियापछि हिँडेरै घर फर्किए थिए ।