साउनदेखि कात्तिक महिनासम्मको अवधिमा जिल्लाका सबै स्थानीय तहले पुँजीगत (विकास) बजेट मात्र होइन, चालु बजेट खर्चमा पनि अपेक्षित प्रगति हासिल गर्न सकेका छैनन् ।
What you should know
रामेछाप — चालु आर्थिक वर्ष २०८२/०८३ को पहिलो चौमासिकमा रामेछापका स्थानीय तहहरूको बजेट खर्च दर सुस्त देखिएको छ ।
साउनदेखि कात्तिक महिनासम्मको अवधिमा जिल्लाका सबै स्थानीय तहले पुँजीगत (विकास) बजेट मात्र होइन, चालु बजेट खर्चमा पनि अपेक्षित प्रगति हासिल गर्न सकेका छैनन् ।
जिल्लाको सदरमुकाम रहेको मन्थली नगरपालिकाले पहिलो चौमासिकसम्म एक अर्ब ४ करोड ६५ लाख ६४ हजार २०२ रुपैयाँ बजेटमध्ये जम्मा १६.४४ प्रतिशत अर्थात् १७ करोड २० लाख ९१ हजार ४०२ रुपैयाँ मात्र खर्च गरेको छ ।
प्रमुख प्रशासकीय अधिकृत देवर्षि सापकोटाका अनुसार चालु तर्फको ७२ करोड १० लाख ७७ हजार रुपैयाँ बजेटमध्ये २३.७९ प्रतिशत अर्थात् १७ करोड १५ लाख ११ हजार खर्च भएको छ । विकास बजेटको अवस्था झनै कमजोर छ ।
३२ करोड ५४ लाख ८६ हजार विकास बजेट रहेकोमा एक प्रतिशतभन्दा पनि कम, अर्थात् १.३३ प्रतिशत ४३ लाख ३२ हजार ६३८ रुपैयाँ मात्र खर्च भएको छ । १४ वटा वडाहरू रहेको मन्थली नगरपालिकामा यसवर्ष १० लाख रुपैयाँभन्दा माथिका ४० वटा र २५ लाखभन्दा माथिका २४ वटा योजनाहरू कार्यान्वयनमा रहेको सापकोटाले बताए ।
मन्थली नगरपालिकाले गत आर्थिक वर्ष २०८१/०८२ को पहिलो चौमासिकमा १५.५५ प्रतिशत जम्मा बजेट खर्च गर्दा १.६५ प्रतिशत पुँजीगत र चालु २१.०९ प्रतिशत बजेट खर्च गरेको थियो ।
पहिलो चौमासिक अवधिसम्म रामेछाप नगरपालिकाको बजेट खर्च पनि सुस्त देखिएको छ । नगरका प्रमुख प्रशासकीय अधिकृत भोलाप्रसाद चापागाईँका अनुसार चालुतर्फ विनियोजित ५१ करोड ८३ लाख ३७ हजार ९७० रुपैयाँमध्ये पहिलो चौमासिकमा ११ करोड ३३ लाख ९५ हजार रुपैयाँ मात्र खर्च गरिएको छ ।
जुन जम्मा २१.८७ प्रतिशत हो । नगरको पुँजीगततर्फ खर्चको अवस्था अझै कमजोर छ । ३३ करोड २७ लाख ९ हजार ९ सय रुपैयाँ विनियोजन गरिएकोमा १.७३ प्रतिशत अर्थात् ५७ लाख ६४ हजार ८२४ रुपैयाँ मात्र खर्च भएको चापागाईँले जानकारी दिए ।
उनले भने, ‘पहिलो चौमासिकमा नगरपालिकाको बजेट खर्च कम छ, विशेष गरी विकास बजेट निकै न्यून छ । चाड–पर्व, प्रक्रियागत ढिलाइ लगायतका कारण पुँजीगत काम सुस्त भएको हो । अब योजनाहरू फाइनल भइसकेका छन्, काम धमाधम अघि बढ्दै छ, त्यसैले खर्च दर पनि तीव्र गतिमा बढ्ने अपेक्षा छ ।’
रामेछाप नगरपालिकामा यस वर्ष पूर्वाधार योजनातर्फ मात्रै २ सय ३४ आयोजना रहेका छन् । तीमध्ये पाँच योजना ठेक्कामार्फत सञ्चालनमा अघि बढेका छन् । ६ वटा योजनाका लागि कोटेसन प्रक्रिया पूरा भएको छ भने ५२ वटा योजना उपभोक्ता समितिमार्फत सञ्चालनका लागि सम्झौता भइसकेको चापागाईँले बताए । पाँच वटा योजना सम्पन्न भई भुक्तानीसमेत गरिसकिएको छ ।
रामेछाप नगरपालिकाले गत आर्थिक वर्षको पहिलो चौमासिकमा जम्मा बजेटको १४.३८ प्रतिशत खर्च गरेको थियो । गत आर्थिक वर्ष २०८१/०८२ को पहिलो चौमासिकमा रामेछाप नगरले चालु तर्फ २०.७७ प्रतिशत र पुँजीगत बजेट १.५३ प्रतिशत खर्च गरेको थियो ।
