हेटौंडा — बालश्रममा संलग्न ५ जना बालकलाई हेटौंडा उपमहानगरपालिकाको विभिन्न वडाबाट उद्धार गरिएको छ ।

अनुगमनको क्रममा विभिन्न व्यवसायिक संस्थाबाट बालश्रममा संलग्न रहेका बालकाहरुलाई उद्धार गरिएको हो ।

बालमैत्री पालिका घोषणा भइसकेको हेटौंडा उपमहानगरपालिकामा बालश्रम अनुगमन गरिएको थियो । हेटौंडाको २, ४, ११ र १९ नम्बर वडामा रहेका मोटरसाइकल वर्कशप, होटल, क्याण्डी उत्पादन कम्पनीलगायतमा अनुगमन गरिएको सिविन बालहेल्पलाइन मकवानपुरका संयोजक झविन्द्र ज्ञवालीले बताए ।

अनुगमनका क्रममा हेटौंडा–११ मा रहेको अब्दुलाल बडी विल्डर वर्कशपमा सात महिनादेखि कार्यरत १५ वर्षीय बालक, हेटौंडा–४ स्थित समिर मोटरसाइकल वर्कशपमा एक वर्षदेखि कार्यरत १२ र १५ वर्षीय बालक, हेटौंडा–११ मा रहेको उद्योगबाट उत्पादित कटन क्याण्डी हेटौंडा–४ बाट बेच्दै गरेको अवस्थामा १० वर्षीय बालकलाई उद्धार गरिएको छ ।

यसैगरी  उपमहाननगर प्रहरीले हेटौंडा–२, कांग्रेसचोकमा रहेको केशरी फर्निचरबाट अन्दाजी १५ वर्षीय बालकलाई उद्धार गरेर श्रम कार्यालय पठाएको कार्यालय प्रमुख रुद्रनारायण शाहले जानकारी दिए । श्रम कार्यालयका प्रमुख शाहका अनुसार बालश्रममा लगाउने रोजगारदाताहरुलाई १ लाख ७० हजार जरिवाना र २२ हजार रुपैयाँ क्षतिपूर्ति तिराइएको छ ।

कटन क्याण्डी उत्पादकलाई ५० हजार, समिर वर्कशपलाई ५० हजार, अब्दुलाल वर्कशपलाई २० हजार र केशरी फर्निचरलाई ५० हजार जरिवाना गराइएको छ । श्रम कार्यालयले बालबालिकाको उमेर समूहअनुसार जरिवाना गराउने गरेको छ । 

बालबालिकाले काम गरेबापत मासिक ३२ हजारका दरले क्षतिपूर्ति दिनुपर्नेछ । उद्धार गरिएका बालकहरुलाई श्रम कार्यालय पठाउने गरिएको सिविन बाल हेल्पलाइनका संयोजक ज्ञवालीले जानकारी दिएका छन् । उद्धार गरिएका बालकहरु चितवन, रौतहट, पर्सा र छिमेकी मुलुक भारतका रहेका छन् । ६ वटा ग्यारेज, ३ वटा होटल र एक किराना पसलमा अनुगमन गरिएको थियो ।